Kölfel 62:1-9

¹Ngeni ewe mi emweni chon köl: Ei köl usun ngingin förien Jetutun köl. Echö än Tafit köl. Üa likitü le witiwiti Kot pwe epwe amanauaei, üa anomu ai apilükülük won i chök.

²I chök a tümwünüei o amanauaei, i a peniei pwe üsap fokun kuf.

³Ifa ükükün fansoun ämi meinisin oupwe fiu ngeni eman chök aramas, pwe oupwe aturala usun eu oror mi söön ika eu tit mi päpäifetal.

⁴Oua chök ekiekin asapwilätiu i seni wisan mi tekia, oua pwapwaäsini kapas chofana. Oua eäni kapasen afeiöch, nge oua otteki me lon lelukemi.

⁵Üa likitü le witiwiti Kot echök, pun üa anomu ai apilükülük won.

⁶I chök a tümwünüei o amanauaei, i a peniei pwe üsap fokun kuf.

⁷Ai küna manau me ai ling ra longolong won Kot. Kot ai achau mi pöchökül me ai lenien op.

⁸Ämi aramas, oupwe lükü Kot fansoun meinisin. Oupwe pwäri ngeni ämi weires meinisin, pun i ach lenien op.

⁹Aramas tekison ra usun chök enienin asepwäl, nge aramas tekia ra usun chök och minen chofana. Are ra kilo, esap wor chour, ra pän seni enienin asepwäl.