Kölfel 57:1-4

¹Ngeni ewe mi emweni chon köl: Ei köl usun ngingin ewe köl itan “Kosap ataela”. Echö än Tafit köl, lupwen a sü seni Saul o sülong lon ewe föimw. Kopwe ümöümöch ngeniei, ai Kot, kopwe ümöümöch ngeniei, pun üa eänuk lenien op. Üa op fän nürün poum, tori ewe mölümölün feiengau a feil seniei.

²Üa siö ngeni Kot, Ewe mi Unusen Tekia, ewe Kot mi alisiei lon mettoch meinisin.

³I epwe tinato an alilis seni läng o amanauaei, i epwe akufu chokewe mi chök tatapweriei. Kot epwe tinato an we tong ellet me an allükülük ngeniei.

⁴Chon oputaei mi wewe ngeni laion mi mwäräräiti le ochei aramas ra pwelifeiliei, ngir ra usun chök siles me föün esefich, nge chönawer ra usun chök ketilas mi ken.