Kölfel 56:4-10

⁴Üa mwareiti än Kot kapas, üa apilükülükü Kot, nge üsap niuokus. Met aramas repwe tongeni föri ngeniei?

⁵Chon oputaei ra sorei mine üa apasa fansoun meinisin, ra chök ekiekietä met repwe afeiengauaei ren.

⁶Ra amwichafengeniir, ra operiei o mamasafetaleei pwe repwe nieila.

⁷Iei mine kopwe liwini ngeniir ar föföringau. Ai Kot, kopwe akufu ekei aramas fän om lingeringer.

⁸En ka küna ai süsüfeil. Kopwe osupwalong chönün mesei lon om rume. Ifa usun, kosap aleaniir?

⁹Lon ewe rän, lupwen üpwe köruk pwe kopwe alisiei, ekewe chon oputaei repwe kul seniei. Ren ei üa silei pwe Kot a peniei.

¹⁰Üa mwareiti än Kot kapas, üa mwareiti än ewe Samol mi Lapalap kapas.