Kölfel 55:1-20

¹Ngeni ewe mi emweni chon köl: Won pisekin ettik mi wor saitenin. Echö än Tafit kölün kait. Ai Kot, kopwe aüselinga ai iotek, kosap asorongorongola seni ai tüngor.

²Kopwe rongorong ngeniei o palüeniei. Ai osukosuk a fokun aweiresiei.

³Üa fokun niuokus ren än chon oputaei eniwaei, pwal ren än ekewe aramasangau ariaföüüei. Ra aweiresiei, nge lon ar song ra fokun oputaei.

⁴Lelukei a fokun riaföü, niuokusun mäla a toriei.

⁵Niuokus me chechech ra feitiu woi, nge niuokus watte a pwölüeila.

⁶Iwe, üa apasa, “Amwo epwe wor pöükässi usun pöükässin eman lisom. Üpwe ässila o kütta ai lenien asösö.

⁷Ewer, üpwe ässila toau o nonom lon ewe fanüapö.

⁸Üpwe müttir le kütta ana ie üpwe op ie seni ewe asepwäl watte me ewe mölümöl.”

⁹Ai Samol, kopwe afitikokoi än ekewe aramasangau kapas. Pun üa küna ar föförün mwäneson me ar aninifengen lon ewe telinimw.

¹⁰Lerän me lepwin ra pwelifetalei me won tittin ewe telinimw. Pwüngingau me weires ra nonom lon,

¹¹feiengau a nom ekis meinisin, nge angangen ariaföü me atuputup ra chök fifis lon ekewe al.

¹²Are eman chon oputaei epwe ämängauaei, üpwe tongeni engila fan. Are eman chon ü ngeniei epwe turunufaseei, üpwe tongeni op seni.

¹³Nge en, chienei, pwal pwii mi achengicheng, en ätewe mi föri iei usun ngeniei.

¹⁴Kich sa pwapwa le akapworausfengen, sa pwal fetalepök ngeni imwen Kot pwe sipwe fel ngeni.

¹⁵Amwo mäla epwe müttir tori ekewe chon oputaei, amwo repwe feilmanauetiu lon lenien sotup. Pun ngau a nom lon lenier pwal lon leluker.

¹⁶Nge ngang üa siö ngeni Kot. Iwe, ewe Samol mi Lapalap epwe amanauaei.

¹⁷Lekuniol me lesosor pwal leoloas üa apasätä ai kewe weires o ngüngü. Iwe, Kot epwe rongorong mweliei.

¹⁸Epwe angasa manauei, pwe üpwe tongeni liwiniti fän kinamwe seni ewe maun üa eäni, inamwo ika chomong aramas ra ü ngeniei.

¹⁹Kot ewe mi mot won an lenien motun king seni me lomlom epwe aüselingaei o akufuur, pun resap mochen siwili ar föför, resap pwal niuokusiti Kot.

²⁰Chienei we me lom a fiu ngeni chiechian o ataela an we pwon.