Kölfel 44:16-25

¹⁶pokiten än ekewe chon ämängau me chon turunufas kapas, pwal pokiten än ekewe chon oputaei liwiningau ngeniei.

¹⁷Ekei mettoch meinisin ra fis ngenikem, nge äm aisap manlükukala ika atai om we pwon.

¹⁸Äm aisap kul senuk, äm aisap pwal aleasolap ngeni om kewe allük.

¹⁹Nge en ka atatakisikem me lon lenien ekewe kolak mi mwacho o pwölükeemila ren rochokichin mäla.

²⁰Are äm aipwe manlükala iten äm we Kot ika iotek ngeni pwal eman koten ekis,

²¹ifa usun, Kot esap küna ei föför? Ewer, pun Kot a silei mine a monomon me lon lelukem.

²²Nge fansoun meinisin aia küna ninni pokitom, äm aia wewe ngeni sip mi amol ngeni ar repwe ninnila.

²³Ai Samol, kopwe pwök! Pwota ka annut? Kopwe nennela! Kosap pöütifochekeemila.

²⁴Pwota ka amona mesom senikem? Kosap manlükala äm riaföü me weires.

²⁵Pun äm aia turula lon pwülümoromor, inisim ra pacheri pwül.