Kölfel 34:4-19

⁴Üa iotek ngeni ewe Samol mi Lapalap, nge i a pälüeniei o angasaei seni ai kewe niuokus meinisin.

⁵Oupwe sachetä ngeni i pwe oupwe pwapwa, nge ousap säw.

⁶Ewe chon mwelele a siö, nge ewe Samol mi Lapalap a aüselinga o amanaua i seni an weires meinisin.

⁷Nöün ewe Samol mi Lapalap chon läng a nom pwelin ünükün chokewe mi niueiti i o angaseer seni feiengau.

⁸Oupwe neni o nengeni pwe ewe Samol mi Lapalap a kirikiröch. Ra feiöch ätekewe mi eäni i lenien op.

⁹Ämi nöün ewe Samol mi Lapalap kewe chon pin, oupwe meniniti i, pun chokewe mi meniniti i resap osupwang.

¹⁰Ekewe laion ra echik, pun esap wor ener. Nge chokewe mi aleasochis ngeni ewe Samol mi Lapalap resap osun och mettoch mi mürina.

¹¹Oupwe feito, ämi nei mwän o aüselingaei, üpwe aiti ngenikemi usun ämi oupwe meniniti ewe Samol mi Lapalap.

¹²Iö me leimi a pwapwaiti manau o mochen manauatam pwe epwe alomota ekewe feiöch meinisin?

¹³Oupwe tümwünükemi pwe ousap eäni kapas mi ngau, ousap pwal kapas chofana.

¹⁴Oupwe kul seni mine a ngau o föri mine a mürina, oupwe kütta kinamwe ren unusen lelukemi.

¹⁵Ewe Samol mi Lapalap a mamasa ekewe chon pwüng, selingan a rongorong ngeni ar siö.

¹⁶Nge a ü ngeni chokewe mi föri mine a ngau, a föri pwe mürin ar mäla aramas repwe müttir manlükirela.

¹⁷Lupwen ekewe chon pwüng ra siön alilis, ewe Samol mi Lapalap a rongorong o angaserela seni ar weires meinisin.

¹⁸Ewe Samol mi Lapalap a kan ngeni chokewe mi luketatakis, a amanaua chokewe mi apilükingau.

¹⁹Chomong riaföü ra tori ewe chon pwüng, nge ewe Samol mi Lapalap a angasala i seniir meinisin.