Kölfel 22:14-31

¹⁴Üa usun chök koluk mi niitiu, lekeilen chüi meinisin ra ruwofesen, lelukei a usun kiris, a telila me leupwei.

¹⁵Lon awei a pwasapwas usun pwül moromor, nge chönawei a pacheetä fän fongochi. Ka likitieila lon pwül moromor usun eman mi mäla.

¹⁶Eu mwichen aramasangau a pwelifeiliei, ra rongeeila usun epwi pwiin kolak. Ra posu pei me pechei.

¹⁷Üa tongeni aleani chüi meinisin. Chon oputaei ra änefotaei o takiriei.

¹⁸Ra üttüt won üfei kewe o ineti lefiler.

¹⁹Nge en, ai Samol mi Lapalap, kosap toau seniei! En ai chon alilis, kopwe müttir feito o alisiei.

²⁰Kopwe angasaei seni afeiengauen ketilas, kopwe angasa manauei seni ekei kolak mi pöchökül.

²¹Kopwe amanauaei seni ekewe laion, kopwe amanaua inisi seni mächän ekewe ätemwänin kow mi mwacho.

²²Üpwe apworausa ngeni pwii kewe mine ka föri, üpwe mwareituk lein ewe mwichen aramas.

²³Ämi mi niuokusiti ewe Samol mi Lapalap, oupwe mwareiti i, ämi mwirimwirin Jakop meinisin oupwe alinga i, ämi chon Israel meinisin oupwe fokun meniniti i.

²⁴Pun Kot esap aliwini eman mi mwelele ika oput eman mi nom lon riaföü. Esap amona mesan seni, nge a pälüeni, lupwen a siö ngeni.

²⁵En popun ai mwareituk me lon ewe mwich mi lap. Üpwe eäni ekewe asor me fän mesen chokewe mi niuokusituk, ekewe asor üa pwon ngonuk.

²⁶Chokewe mi wöüngau repwe mongö o möt. Chokewe mi feito ren ewe Samol mi Lapalap repwe mwareiti i. Amwo repwe feiöch tori feilfeilachök.

²⁷Chon fanüfan meinisin repwe chechemeni ewe Samol mi Lapalap o kuliti i. Chon ekewe ainang seni ekewe mwü meinisin repwe fel ngeni.

²⁸Pun ewe Samol mi Lapalap i king, i a nemeni ekewe mwü.

²⁹Ewer, ekewe chon lamalamtekia meinisin me won fanüfan repwe chapetiu mwan, chokewe meinisin mi feil ngeni mäla repwe fotopwäsuk me mwan, pwal chokewe resap tongeni püsin amwöchü manauer.

³⁰Mwirimwirich repwe angang ngeni i. Aramas repwe apworausa ngeni ewe täppin aramas epwe feito usun ewe Samol,

³¹repwe asilefeili ngeni ekewe aramas resamwo uputiu, “Ewe Samol mi Lapalap a amanaua nöün aramas.”