Kölfel 22:1-16

¹Ngeni ewe mi emweni chon köl: Ei köl usun ngingin ewe köl itan ‘Ewe chian wünümweerän.’ Echö än Tafit köl. Ai Kot, ai Kot, pwota ka likitieila? Pwota ka fokun toau seniei fän om alilis, pwal seni ai siöngau?

²Ai Kot, üa siö ngonuk lerän, nge kosap pälüeniei, üa siö ngonuk lepwin, nge üsap tongeni asösö.

³Nge en ka pin. Ka mot won om lenien motun king, en ewe chon Israel ra kölün mwareiti.

⁴Äm kewe lewo ra anomu ar apilükülük womw. Ra apilükülükuk, nge en ka angaserela.

⁵Ra siö ngonuk, nge en ka amanaueer, ra apilükülukuk, nge resap lichipüng.

⁶Nge ngang eman moso, sap eman aramas, üa küna esit me koput me ren aramas.

⁷Meinisin mi künaei ra turunufaseei, ra akopea awer o alifechefechi mökürer ngeniei.

⁸Ra apasa, “A anomu an apilükülük won ewe Samol mi Lapalap, i epwe angasa, i epwe amanaua, pun a pwapwa ren.”

⁹Nge en ewe mi atoeiwu seni lon letipen inei, ka tümwünüöchüei, lupwen üa eman mönükol.

¹⁰Seni leuputiuei üa apilükülükuk, seni ewe fansoun inei a nöünieitiu en ai Kot.

¹¹Kosap toau seniei, pun osukosuk a arap ngeniei, nge esap wor eman a alisiei.

¹²Chomong chon oputaei ra pwelifeiliei usun epwi pwin ätemwänin kow, ra nom ünüki usun ätemwänin kow mi pöchökül seni Pasan.

¹³Ra amassaw ngeniei usun eman laion mi mwacho a wörüwör o atatakisi liapan.

¹⁴Üa usun chök koluk mi niitiu, lekeilen chüi meinisin ra ruwofesen, lelukei a usun kiris, a telila me leupwei.

¹⁵Lon awei a pwasapwas usun pwül moromor, nge chönawei a pacheetä fän fongochi. Ka likitieila lon pwül moromor usun eman mi mäla.

¹⁶Eu mwichen aramasangau a pwelifeiliei, ra rongeeila usun epwi pwiin kolak. Ra posu pei me pechei.