Kölfel 18:17-50

¹⁷A angasaei seni ekewe chon pälüeniei mi pöchökül, seni chokewe mi oputaei, pun ra kon pöchökül ngeniei.

¹⁸Iwe, ra münitiei lon ränin ai feiengau, nge ewe Samol mi Lapalap a tümwünüei.

¹⁹A alisiei lon ai feiengau o angasaei, pun a pwapwa rei.

²⁰Ewe Samol mi Lapalap a liwiniöchüei, pun üa föri mine a pwüng, a afeiöchüei, pun esap wor ai tipis.

²¹Üa aleasochisi än ewe Samol mi Lapalap kewe allük, nge üsap rik seni ai Kot ren och föför mi ngau.

²²Üa apwönüetä an kewe allük meinisin, nge üsap aleasolap ngeni an kewe pwüüng.

²³A silei pwe esap wor ai mwäl, pwe üa püsin tümwünüei seni tipis.

²⁴Iei mine ewe Samol mi Lapalap a liwiniöchüei, pun üa föri mine a pwüng, pun a silei pwe esap wor ai tipis.

²⁵Ai Samol mi Lapalap, ka allükülük ngeniir mi allükülük, ka pwal pwärätä om unusen pwüng ngeniir mi unusen pwüng.

²⁶Ka pwärätä om limelimöch ngeni ir mi limelimöch, nge ekewe mi pwor manauer ka pwärätä om pöchökül ngeniir.

²⁷Ka angasa aramas mi tipetekison, nge chokewe mi lamalamtekia ka atekisoneretiu.

²⁸Ai Samol mi Lapalap, ka asarama manauei, en ai Kot ka awili ai rochopwak ngeni saram.

²⁹Ewer, ren om alisiei üa tongeni fiu ngeni ekewe chon oputaei, ren en ai Kot üa tongeni mwet won eu tit.

³⁰Än Kot kewe föför ra unusen pwüng, än ewe Samol mi Lapalap kapasen pwon a let. I a usun chök tittin maun fän iten chokewe meinisin mi op ren.

³¹Ewe Samol mi Lapalap i chök Kot. Kot echök ach achau.

³²I ewe Kot mi apöchökülaei o anükünüköchü ai al.

³³A amüttiriei usun müttirin chia, a pwal aleniöchüei won ekewe leni mi tekia.

³⁴A asipa pei ngeni maun pwe üa tongeni pworefengeni efoch esefich seni piras.

³⁵Ka epeti seniei feiengau o amanauaei, poum a amwöchüei, nge om alilis a atekiaeitä.

³⁶Ka achölapa ewe al üa fetal won, pwe pechei esap mit.

³⁷Üa tapweri chon oputaei o liapeniir. Üsap kulsefäl seniir tori ra rosola.

³⁸Üa atururela pwe resap chüen tongeni ütä. Ra turula arun pechei.

³⁹Ka ngeniei pöchökül pwe üa tongeni maun, ka pwal akufu me mwei ekewe chon ü ngeniei.

⁴⁰Ka föri pwe ekewe chon pälüeniei ra sü seniei, üa arosala chokewe mi oputaei.

⁴¹Ra siö pwe eman epwe alisiir, nge esap wor eman a amanaueer. Ra siö ngeni ewe Samol mi Lapalap, nge esap pälüeniir.

⁴²Üa üsiir pwe ra usun chök pipisüsü asepwäl a ässala. Üa puriretiu usun pwakaken lon ekewe al.

⁴³En ka angasaei seni ekewe aramas mi ü ngeniei, ka seikieitä pwe üpwe samolun ekewe mwü. Ekewe aramas üsap sileer me mwan ra nom fän nemeniei.

⁴⁴Ra aleasochisiei lon ewe otun ra rong mweliei. Chon ekis ra feito o chapetiu mwei.

⁴⁵Iwe, ra apilükingau, ra towu seni ar kewe lenien maun mi pöchökül fän chechech.

⁴⁶Ewe Samol mi Lapalap a manau. Üa mwareiti ai achau, üa ingeiti ai Kot mi amanauaei.

⁴⁷Kot a atufichiei pwe üpwe ngeni chon oputaei chappen ar föför, a anomu fai aramasen ekewe mwü. A amanauaei seni ekewe chon pälüeniei.

⁴⁸En ai Samol mi Lapalap ka atekiaeitä asen chon ü ngeniei o angasaei seni ekewe aramas mi mwäneson.

⁴⁹Iei mine üpwe ingemwareituk me lein chon ekewe mwü. Ai Samol mi Lapalap, üpwe kölün mwareituk.

⁵⁰Kot a ngeni nöün we king win mi lapalap o pwäri an tong ellet ngeni nöün we mi kepit, ngeni Tafit me mwirimwirin kewe tori feilfeilachök.