Kölfel 135:2-20

²ämi mi angang lon imwen ewe Samol mi Lapalap, ämi mi nom lon ekewe leni ünükün imwen ach we Kot.

³Oupwe mwareiti ewe Samol mi Lapalap, pun a kirikiröch. Oupwe kölün mwareiti itan, pun i a ümöümöch.

⁴Ewe Samol mi Lapalap a filätä Jakop fän püsin itan, a filätä ekewe chon Israel pwe epwe nöüniir.

⁵Üa silei pwe ewe Samol mi Lapalap a tekia, a nom asen ekewe kot meinisin.

⁶Ewe Samol mi Lapalap a föri meinisin mine a efich lon läng pwal won fanüfan, lon ekewe matau pwal lon ekewe leni mi alolol meinisin.

⁷I ewe mi atötäi ekewe kuchu me lesopun fanüfan, a förätä inefi fiti püngün üt, a pwal atowu asepwäl seni an lenien iseis.

⁸I ewe mi niela ekewe mwänichi lon Isip, ekewe mwänichien aramas me ekewe mweinöün man,

⁹a föri ekewe asisil me manaman lefilen ekewe chon Isip, pwe epwe apwüngü Farao me nöün kewe nöüwis meinisin.

¹⁰I ewe mi ataela chomong mwü o niela ekewe king mi pwora.

¹¹A niela Sihon ewe kingen chon Amor, pwal Ok ewe kingen Pasan me ekewe kingen Kanaan meinisin,

¹²nge fanüer a ngeni nöün kewe aramasen Israel pwe repwe fanüeni.

¹³Ai Samol mi Lapalap, itom a nonom tori feilfeilachök. Ai Samol mi Lapalap, iteüöchum a nonom fansoun meinisin.

¹⁴Pun ewe Samol mi Lapalap epwe alletätä pwüngün nöün kewe aramas o eäni tong ngeni nöün kewe chon angang.

¹⁵Än chon ekewe mwü uluulun anümwäl seni silifer me kolt aramas chök ra föri.

¹⁶A wor awer, nge resap tongeni kapas, a wor meser, nge resap tongeni küneer.

¹⁷A wor selinger, nge resap tongeni rongorong, resap pwal tongeni ngasangas.

¹⁸Ewer, chokewe mi föri ekewe uluulun anümwäl o lüküür repwe pwal wewe ngeni ekewe uluulun anümwäl.

¹⁹Ämi chon Israel, oupwe mwareiti ewe Samol mi Lapalap. Ämi mwirimwirin Aaron, oupwe mwareiti ewe Samol mi Lapalap.

²⁰Ämi mwirimwirin Lefi, oupwe mwareiti ewe Samol mi Lapalap. Ämi meinisin mi niuokusiti ewe Samol mi Lapalap, oupwe mwareiti i.