Kàdduy Waare 3:2-22

²Day jot nga juddu, mu jot nga dee; mu jot nga jëmbat, mu jot nga buddi.

³Mu jot nga rey, mu jot nga faj; mu jot nga toj, mu jot nga tabax.

⁴Mu jot nga jooy, mu jot nga ree; mu jot nga ñaawlu, mu jot nga dukkat.

⁵Day jot nga sànniy doj, mu jot nga dajale; mu jot nga fóon, mu jot nga baña fóon.

⁶Mu jot nga sàkku, mu jot nga ñàkk; mu jot nga sàmm, mu jot nga xalab.

⁷Mu jot nga xar, mu jot nga gaar; mu jot nga selaw, mu jot nga wax.

⁸Mu jot nga sopp, mu jot nga jéppi; mu jot nga xare, mu jot nga jàmmoo.

⁹Ana lu liggéeykat biy jariñoo ciw ñaqam?

¹⁰Gis naa ne sas la bu Yàlla sase, nu war koo sasoo.

¹¹Lépp la Yàlla def, ba bu jotee rafet. Moo may nit muy njort ëllëg, te taxul mu mana ràññee jëf ji Yàlla jëf, njàlbéen ba muj ga.

¹²Ma gis ne nit amul lu gën bànneex ak jàmmi bakkan cig dundam,

¹³te nitoo nit, su dee lekk ak a naan, di ñaq, jariñoo, loolu mayu Yàllaa.

¹⁴Ma xam ne lu Yàlla def, loola day sax ba fàww. Deesu ci yokk, mbaa di wàññi dara; Yàllaa ko def, ngir nit di ko wormaal.

¹⁵Lu ay tey, ayoon na, lu ay ëllëg it ayoon na. Yàllaay namma indi la woon.

¹⁶Ma dellu gis fi kaw suuf ne, fu yoon moom, fa la njubadi ne, fa njub moom it, fa la njubadi ne.

¹⁷Saam xel ne ma, ku jub ak ku bon la Yàlla di boole àtte, ngir mbir mu ne ak jëf ju ne ak bésam.

¹⁸Saam xel neeti ma, nun doom aadama, Yàllaa nuy nattu, nu gis ne ay mala doŋŋ lanu.

¹⁹Dogalu doom aadama ji ak dogalu mala mi, benn dogal bee; ni kii di deeye la kee di deeye, genn noo gee, nu bokk ko. Lu nit ëpplee mala neen na, ñoom ñépp, cóolóoli neen.

²⁰Ñoom ñépp a bokk jëm benn bérab ba, bokk jóge pëndub suuf, bokk dellu suuf.

²¹Ana ku mu wóor ne bakkanu nit day yéeg asamaan, bakkanu mala tàbbi suuf?

²²Ma gis nag ne nit amul lu gën di bànneexoo ñaqam, loolooy wàllam. Ana ku koy xamal gannaawam?