Kàddu yu Xelu 30:4-24

⁴Ana ku yéegoon asamaan, ba wàcc? Mbaa mu masa ŋëb ngelaw ciy loxoom? Ana ku masa ëmb ndox ci ndimo? Mbaa mu rëdd mboolem kemi àddina? Nu mu tudd ak nu doomam tudd? Wax ma, yaw mi ko xam!

⁵Lu Yàlla wax, mat na sëkk, mooy yiir ku ko làqoo.

⁶Bul yokk ay waxam, mu weddi say fen, nga weeru.

⁷Éy Yàlla, yaar laa la ñaan, ngalla may ma ko sama giiru dund:

⁸caaxaan aki fen, yal na ma sore, néewleek barele, bu ma ci may lenn, leel ma lu ma doy;

⁹lu ko moy ma regg, weddi la, ba naan: «Kuy Aji Sax ji?» Mbaa ma ñàkk bay sàcc, di la ñàkke worma, yaw sama Yàlla.

¹⁰Bul sikkal ab surga ca njaatigeem, da lay ñaan-yàlla, mu dal la.

¹¹Ag maas a ngi saaga baay, te wormaaluñu ndey.

¹²Ag maas a ngi defe ne set nañu, te taq ripp ak bàkkaar.

¹³Ag maas a ngi daŋŋiiral; aka ñoo mana xeeloo!

¹⁴Ag maas a ngi, seeni sell niy saamar, seeni gëñ niy paaka, ñuy lekk néew-ji-doole, ba raafal leen ci réew mi, ba ku ñàkk jeex ci biir nit ñi.

¹⁵Saxu watar du suur, ñaar ñu jigéen la am: Jox Ma ak Jox Ma. Ñett a ngii ñu dul suur, ba ci ñeent ñu dul ne doy na mukk:

¹⁶njaniiw, jigéen ju jaasir, suuf, du màndi ndox, sawara, du ne doy na mukk.

¹⁷Kuy xeelu sa baay, di siidee déggal sa ndey, baaxoñ génne ciw xur, luqi sa bët, tan ya lekk.

¹⁸Ñett a ngii, yéem na ma, ba ci ñeent yu ma xamul:

¹⁹yoonu jaxaay ci asamaan, yoonu jaan ci kawi doj, yoonu gaal ci diggu géej, yoon wi góor di jaar as ndaw.

²⁰Jikkoy jigéenu moykat a ngi. Day lekk, wommiku, te naan: «Defuma dara lu aay!»

²¹Ñett a ngii, day yëngal suuf, ba ci ñeent yu suuf àttanul:

²²jaam bu falu buur, dof bu regg,

²³ndaw su bon su for jëkkër, jigéen ju wuutu sangam bu jigéen.

²⁴Ñeent a ngii, di lu tuut ci kaw suuf, te am xel, yaroo xel: