Kàddu yu Xelu 1:11-32

¹¹Dañu la naan: «Dikkal, nu tëruji bakkan, yeeruji jaambur bu deful dara.

¹²Nanu mel ni njaniiw, mëdd kuy dund, mu jekki tàbbi biir bàmmeel.

¹³Mboolem alal ju réy, nu jagoo, yeb sunu biir kër, mu fees.

¹⁴Dikkal nu far, mbuus miy benn, nu bokk.»

¹⁵Doom, bul ànd ak ñoom ciw yoon, bul jaare fa ñuy jaar,

¹⁶ngir dañuy xélu, nar musiba, di gaawtuy sànk bakkan.

¹⁷Doo firib caax, ba jàpp njanaaw luy xoole.

¹⁸Ñii kat seen bopp lañuy fiir, seen bakkanu bopp lañu sànk.

¹⁹Képp kuy lekk lu lewul, nii lay mujje: wutin wu lewul jël bakkanu boroom.

²⁰Xel mu Rafet a ngay woote ca mbedd ma, di xaacu ca pénc ma.

²¹Ma ngay wootee bérab yu gëna xumb, di dégtaley kàddoom, bunt dëkk ba.

²²Ma nga naan: «Moo téxét bi, foo àppal sa téxét gi? Ñaawlekat bi, foo àppal sa ñaawle bi? Dof bi, ñaata yoon ngay bañ xam-xam?

²³Soo dëppee ba déglu, ma àrtu la. Ma ne, kon ma xellil la samam xel, xamal la samay kàddu.

²⁴Damaa woote, nga gàntal, ma tàllal loxo, faaleesu ma.

²⁵Sofental nga samay digle, nanguwoo samay àrtu.

²⁶Kon boo sëngéemee, man it ma ree, njàqare dab la, may textexi.

²⁷Njàqare di ngëlén, dab la, sa musiba def callweer, buub la, njekkar ak fitna dal la.

²⁸Keroog nga woo ma wall, duma wuyu, nga seet ma, seet, doo ma gis.

²⁹Daa fekk nga baña xam, te ragal Yàlla du loo taamu.

³⁰Dégluwoo samay digle it, xanaa xeeb samay àrtu yépp.

³¹Waaye loo ci góobe, gar ko, say pexe suur la këll.

³²Déggadi sànk ab téxét, naagu rey ab dof.