Jueces 16:8-13

⁸Geb degine, Filistea-dulemar-e-dummagan dub-dutusulid-binid-amba yoo-dingued, goagugle (7) Dalilaʼse searmalad. A-dubgi Dalila Sansón-gugmaksad.

⁹Dalila-e-gabedneggi bato guakwaa Filistea-dulemar nakulegega bukwasoggu, Dalila Sansónʼse binnasur goted: —¡Sansón, Filistea-sordamar begi gwichigudani! Sansón gwichiguargu, e-gugmakaled dub-nunudyob itirisad. Degisoggu, Filistea-dulemar Sansón-e-gargangued-siid wisgussurmalad.

¹⁰Degi, Dalila Sansónʼga sogded: —Be an-yardaksa. Be anga yamo gakansasad. Be anga inniki-soge, ¿igi-dule nabir be-gugmakergebe, adi, nabir be-gamalagar?

¹¹Sansón abin-sogded: —Urdub-bini-binidgi sabsur ise-gugmakar be an-edinnele, an-gangued nollomakdoed, dulemar-yogasaaledyob an nolloo nadoed.

¹²Dalila-e-gabedneggi bato guakwaa Filistea-dulemar nakulebukwadgi, Dalila Sansón-gugmaksad. Agine, Dalila binnasur goted: —¡Sansón, Filistea-sordamar begi gwichigudani! Sansón gwichigudgu, e-gugmakaled dub-garagwadyob itirisad.

¹³Geb Dalila Sansónʼga sogdebalid: —Gannar be an-yardaksa. Emi, be anga yamo gakansasbalid. Be anga nue-inniki soge, ¿igi-dule nabir be-gugmakergebe, adi, nabir be-gamalagar? Sansón ega sogded: —An-sailagia-sobarmalad giagugle (7) gwinni-dubba be sobele, degi, gwinni ise-digar e-bargamaladgi be imakele, an-gangued nollomakdoed, dulemar-yogasaaledyob an nolloo nadoed.