Judges 6:3-39

³Yug nap’an nra yung piyu Israel e woldug rorad, me yib e pi Midian nge pi Amalek nge pi ganong ni yad ma par u daken e ted ngar chamgad ngak piyu Israel.

⁴Miyad par u daken e re gi but’ nem ngar gathathoyed e woldug riy nge yan i mada’ ngalan e yimuch u Gaza. Yad ma fek gubin e saf, garbaw, nge dongki, ngar paged yu Israel ni dariy ban’en u pa’rad.

⁵Yad ma yib ni kar feked yuran’ i gamanman rorad nge pi tent, ma yad pire’ ni bod feni yo’or e asmen’ing. Yad nge pi kamel rorad e kayigi pag fini yo’or ndabiyag i the’eg. Nap’an ni yad ra yib nga daken fare gi but’ ma dakriy ban’en nra fel’ riy,

⁶piyu Israel e kem’ay gelingrad u pulwonrad.

⁷Ma aram me yornag yu Israel ngak SOMOL ni nge ayuwegrad rok yu Midian,

⁸me pi’ SOMOL ba profet ngorad, ni ir e fek e thin rok SOMOL i yib ngorad, ni ir fare Got nu Israel ni be ga’ar, “Um pired u Egypt ni gimed e sib rok piyu Egypt mu gu chuwegmed u rom.

⁹Gu lagmed u pa’ yu Egypt nge pi’in ur chamgad ngomed u roy. U gu tulufrad ngar chuwgad ma gimed be yan nga m’on, mu gu pi’ taferad ngomed.

¹⁰Mu gog ngomed ni gag fa’anem i SOMOL ni Got romed, ma dab mu tedfan e pi got rok e pi Amor, ni nam rorad e gimed be par riy e chiney. Machane gimed e da mu motoyilgad ko tin gog ngomed.”

¹¹Ma aram me yib e engel rok SOMOL ko fare binaw nu Ofrah nge yib i par nga but’ u tanggin fare ke gek’iy ni oak ni fi’in Joash, ni be’ ko fare ke girdi’ rok Abiezer. Be’ nib mo’on ni fak ni Gideon fithingan e ke mith ni be gunugunuy e wheat u lan ban’en nma uduy e grape, be mith rok piyu Midian.

¹²Me m’ug fare engel rok SOMOL ngak me ga’ar ngak, “I gur reb e pumo’on ndariy e marus rom, ma SOMOL e bay rom!”

¹³Me ga’ar Gideon ngak, “Siro’, rayag ni gu fith ngom e re bugithin ni ba’aray? Fa’anra bay SOMOL romad me ere mangfan urngin e pi gafgow ney nike yib ngomad? Mang e ke rin’ urngin fa pin’en ni bfel’ nma weliy pi chitamangimad murung’agen ngomad ni i rin’ SOMOL, ni murung’agen rogon ni fekrad nga wuru’ yu Egypt? I SOMOL e ke pagmad. Ke n’agmad nga pa’ piyu Midian.”

¹⁴Me yog SOMOL ngak e n’en nge rin’, ni ga’ar, “Mman ngari mus rogom riy ngam laeg yu Israel u pa’ yu Midian. I gag e kug l’oegem.”

¹⁵Me fulweg ni ga’ar, “SOMOL, uw rogon ni nggu ayuweg piyu Israel? Ya fare ke girdi’ rog e ir e th’abi me’waer u fithik’ girdi’en e ganong rok Manasseh, mi gag e th’abi sobut’ u fithik’ e girdi’ ko birog e tabinaw.”

¹⁶Me filuweg SOMOL, “Rayag rom ya gu ra ayuwegnem. Bay mu pirdi’iy yu Midian nrib mom ni gowa ta’abe’ e kamcham ngak!”

¹⁷Me ga’ar Gideon, “Fa’anra gub fel’ u wun’um, me ere mu dag e mich riy ngog nri gur SOMOL.

¹⁸Wenig ngom, dab mman nge mada’ ko ngiyal’ ni kugfek ba ggan nggu pi’ ngom ni maligach.” Me ga’ar, “Bay gu son nigem ngam sul.”

¹⁹Me yan Gideon ngalan e naun rok nge lith ba kaming ni kab bitir, me ngongliy gonap’an reb e dabiy e flowa ndariy e is riy. Me tay e ufin riy ngalan ba dug me tay l’ogowen ngalan ba th’ib, me fek i yib ngak fare engel rok SOMOL ni bay u tan fare ke gek’iy ni oak, me pi’ ngak.

²⁰Me ga’ar fare engel ngak, “Mu tay e pi ufin nir nge flowa nga daken e re war ni ba’aray, ma ga pu’og l’ogowen e pi ufin nir nga daken.” Me rin’ Gideon ni aram rogon.

²¹Me ganam fare engel rok SOMOL nge mathnag taban e sog rok ni bay u pa’ ko fapi ufin nge fapi flowa. Me yib e nifiy u fithik’ fare war ngalang nge urfiy fapi ufin nge fapi flowa. Ma aram me m’ay fare engel ngabang.

²²Me nang Gideon ni engel rok SOMOL e ke guy, me yog u fithik’ e marus ni ga’ar, “SOMOL ni Th’abi Tolang! Kug guy fare engel rom nga owcheg!”

²³Machane me ga’ar SOMOL ngak, “Nge par e gapas rom; dab mu rus, ya dab mum’.”

²⁴Me toy Gideon ba altar u rom ni fan ngak SOMOL, me tunguy fithingan e re altar nem ni ga’ar, “I SOMOL e ir e Gapas.” (Kabay e re altar nem u Ofra, nib mil suwon ngak fare ke girdi’ rok Abiezer.)

²⁵Re nep’ i n’em e ga’ar SOMOL ngak, “Mu fek fare garbaw ni pumo’on ni fak e chitamam, nge ku reb e garbaw ni pumo’on ni medlip e duw yangren, ma ga buthug fare altar rok e chitamam ni toy ni fan ngak Baal, ma ga th’ab nga but’ fare pow rok Asherah ni bay u charen.

²⁶Ma ga toy ba altar ni bfel’ rogon i ubung u daken e chi burey ney ni fan ngak SOMOL ni Got rom. Ma ga fek e bin migid e garbaw ni pumo’on ngam urfiy ni polo’ ni maligach, ma ga fanay ni l’ud fare pow rok Asherah ni mu th’ab nga but’.”

²⁷Me fek Gideon ragag e tapigpig rok nge rin’ e tin keyog SOMOL ngak. Me rin’ ni nep’, ya be tamdag ngak girdi’en e tabinaw rok nge girdi’ nu lan binaw.

²⁸Ma fa’ani od e girdi’ nu lan binaw ni kadbul, miyad pir’eg fare altar rok Baal nge fare pow rok Asherah ni kan th’ab nga but’, ma bay fa bin migid e garbaw ni pumo’on ni ka ni urfiy u daken fare altar ni kan toy u rom.

²⁹Miyad fithrad ni yad be ga’ar, “Mini’ e ke yodroy? Miyad fith murung’agen i yan miyad pir’eg ni Gideon nib mo’on ni fak Joash e ke yodrom.

³⁰Ma aram miyad ga’ar ngak Joash, “Mu fek fare pumo’on ni fakam i yib ngaray nggu li’ed ngem’! Ya ke buthug fare altar rok Baal ma ke th’ab fare pow rok Asherah ni bay u charen.”

³¹Machane me ga’ar Joash ngak urngin e pi’in karbad ngak, “Mogned, ke yo’or lungmed ni bochan Baal? Gimed be yoror rok? En ku ra yog ban’en u murung’agen e yira thang e fan rok ndawori gabul ni kadbul. Fa’anra Baal e ba got, min pag nge ayuweg ir. Ir e altar rok e kan buthug.”

³²Ma aram e ngiyal’nem i yan nga m’on e ni piliyeg fithingan Gideon nge par ni Jerubbaal ni bochan e ga’ar Joash, “Mpaged Baal nge mang ir e ayuweg ir; ya ir e altar rok e kan buthug.”

³³Ma aram me mu’ulung urngin yu Midian, nge yu Amalek, nge fa yu ulung i girdi’ ni yad ma par u daken e ted, miyad th’ab e lul’ ni Jordan nga baraba’ ngarbad ra pired ngalan e loway u Jezreel.

³⁴Me yib i ying fare gelngin SOMOL ngak Gideon nge gagiyegnag, nge thoy ba yabul ni be pining e pumo’on ko fare ke girdi’ rok Abiezer ni ngar leked.

³⁵Miki l’oeg e pi tamal’og ngranod u l’agruw raba’ fare ganong rok Manasseh ni yibe piningrad ni ngar leked. I l’oeg e pi tamal’og ko pi ganong rok Asher, Zebulun, nge Naftali, ma go’ rabad ni ngar uned ngak.

³⁶Me ga’ar Gideon ngak Got, “Kamog ni kam leamnag ni gag e ngam pi’eg nggu ayuweg yu Israel.

³⁷Bay gu tay boch bunu’en e saf nga daken e but’ ko gin gamad ma gunugunuy e wheat riy. Ma fa’anra yan i kadbul ni kemus nu daken e pi bunu’en e saf nem e bay e wa’angachal riy ma daken e but’ u to’oben e ba mlik’, ma aram e kug nang ni gag e ngam pi’eg nggu ayuweg piyu Israel.”

³⁸Ma aram e n’en ni rin’. Fa’an ni od Gideon nri kakadbul me uduy fapi bunu’en e saf, me yib e ran riy nge sugnag baraba’ i dabiy.

³⁹Me ga’ar Gideon ngak Got, “Dab mu puwan’ ngog; mu runguyeg ya ngku gog ta’ab ban’en. Wenig ngom, mu runguyeg ngku gu ngongliy reb e sikeng ko pi bunu’en e saf ney. Mu gagiyegnag nge par e pi bunu’en e saf ney nib mlik’, ma ga gagiyegnag nge par ni kemus ni daken e but’ e bay e wa’angachal riy.”