Judges 4:6-21

⁶Reb e rran me mulwoliy Barak ni nge yib, ni be’ nib mo’on ni fak Abinoam nma par u lan e binaw nu Kedesh ni bay u lan yu Naftali, me ga’ar fare pin ngak, “SOMOL ni ir e Got rok piyu Israel, e ke motochiyel ngom ni be ga’ar: ‘Ngam fek 10,000 e pumo’on ko ganong rok Naftali nge Zebulun ngam gafaliyrad ko fare Burey nu Tabor.

⁷Bay gu fek Sisera i yib, ni ir pilungen e salthaw rok Jabin, ni nge cham ngom ko lul’ ni Kishon. Bay yib nike fek e pi chariot nge pi salthaw rok, machane bay gu gel nagem.’”

⁸Ma aram me fulweg Barak ni ga’ar ngak Deborah, “Gu ra yan ni fa’an ga ra un ngog, ma fa’anra dab mu’un ngog ma dab gu wan.”

⁹Me fulweg fare pin ni ga’ar, “Kefel’, bay gu un ngom, machane dab nognem ni gur e ka mu gel, ya bayi pi’ SOMOL Sisera nga pa’ be’ ni bpin.” Me sak’iy Deborah nge un ngak Barak ngranow nga Kedesh.

¹⁰Me ulunguy Barak e ganong rok Zebulun nge Naftali nga Kedesh, ma 10,000 e pumo’on e ra uned ngak. Me un Deborah ngak.

¹¹Ma ke n’uf Heber ni be’ nu Keni e tent rok nib chugur nga Kedesh, ma ba chugur ko fare ke gek’iy ni oak ni bay u Zaanannim, nike chuw u fithik’ e tin kabay e girdi’ nu Keni, ni yad e pi’in owchen Hobab, nib mo’on ni walagen le’engin Moses.

¹²Minog ngak Sisera, ni Barak ni be’ nib mo’on ni fak Abinoam e ke yan nga daken e burey ni Tabor.

¹³Me yog ni nge yib fa 900 i chariot ni wasey nge urngin e salthaw rok, me l’ograd ngranod u Harosheth nma par e pi Gentile riy ko fare lul’ ni Kishon.

¹⁴Me ga’ar Deborah ngak Barak, “Mman! Ya daba’ e ke gagiyegnag SOMOL ni ngam gel ngak Sisera ko mael. Ya SOMOL e be pow’iyem!” Me yan Barak u daken e burey ni Tabor nga p’ening ni yad fa 10,000 i pumo’on ni salthaw rok.

¹⁵Ma fa’an ni m’ug Barak ngorad ni yad e salthaw rok, me balyangnag SOMOL Sisera nib mu’un fapi chariot rok ngay nge salthaw rok. Me og Sisera u chariot rok nga but’ nge mil.

¹⁶Me lol’oeg Barak fapi chariot nge fapi salthaw ngar mada’gad nga Harosheth nma par e pi Gentile riy. Miyad li’ e salthaw rok Sisera ni gubin, ni de magey be’.

¹⁷Me mil Sisera ko tent rok Jael, ni le’engin Heber ni be’ u Keni, ya Jabin, ni ir e pilung u Hazor, nge tabinaw rok Heber e bfel’ thilrad.

¹⁸Me yan Jael ngar mada’gow Sisera, me ga’ar ngak, “Moy, moy ngalan e tent rog. Dab kum rus.” Me yan ngalan e tent rok, me mithag nga fon bangi mad ni kateng.

¹⁹Me ga’ar Sisera ngak Jael, “Wenig ngom, mpi’ e ran nggu unum, ya ku gum’ ni belel.” Me bing ba tutuw ni keru’ e gamanman ni bay e milik riy, me pi’ boch riy nge unum, nge mu’ me mithag.

²⁰Me ga’ar Sisera ngak, “Mu sak’iy nga langan e mab ko re tent ney, ma fa’anra yib be’ i fithem ko bay be’ u roy fa dariy me lungum dariy.”

²¹Mri mol Sisera, ya kari aw parwon. Me fek Jael ba ama nge ba richib ko tent me n’ag lingan nge yan ko gin bay riy, me yan i richibiy fare richib nga baraba’ i lolugen nge yan i for u baraba’ nge yan nga fithik’ e but’, me yim’.