Juan 9:9-20

⁹“Siya sa yan,” kanan di odom. Ngem di odom pay et kanan da, “Baken met, ngem sana ay is-iso na.” Asi et kanan din lalaki, “Sak-en adi di.”

¹⁰Asi da et pooten en sisya ay nangwani, “Yan nay ay makaila ka ed wani mo?”

¹¹Kanana ay sinmongbat, “Din doy manngadan si Jesus et nan-amag si pitek, asi na pay in-aplos sin matak yan kanana en, ‘Emey kad Siloam ta en ka mandaop.’ Enak ngarud nandaop, et pag maibolinasnasan matak.”

¹²Asi da et kanan, “Intoy kad-ana?” “Toan adi,” insongbat na.

¹³Idi siya di, in-ey da din lalaki ay sana sin Fafariseo.

¹⁴Tan agew ay pan-ibbayan di nangamagan Jesus si pitek ay nangaan sin godab na.

¹⁵Pag pooten din Fafariseo mo sinoy naamag en sisya, pag makaila. Kanan din lalaki, “Waday in-aplos na ay pitek sin matak, asiak en daopan, et nay makailaak.”

¹⁶Isonga kanan di odom ay Fafariseo, “Adi met inbaan Diyos din ipogaw ay doy, tan adi na tongtongpalen din linteg maipanggep sin agew ay pan-ibbayan.” Dowan et kanan di odom, “Aw kayman, ngem mo nakabasol iman di, ay siya mo makaamag si nakaskasdaaw ay sinyal ay kaman dadi?” Et nankinontra da.

¹⁷Idi siya di, pinoot da kasin sin lalaki ay doy, “Sik-a pay, sinoy kanam maipanggep en sisya, tan sik-a dedan di nakin matas naibolinasnasan?” “Mamadtos sisya,” insongbat na.

¹⁸Ngem sigaan pay din papangolon di Judio ay mamati ay din doy lalaki ay makaila ed wani et naianak ay nagogodab mo adi da pooten agan-o sin nakin anak en sisya. Isonga inpaayag das daida

¹⁹et inbagaan da, “Ay si naey din anak yo ay kanan yo en nangibelas godab na? Mo siya, intoy inyat na pay ay makaila ed wani?”

²⁰Sombat pay din nakin anak, kanan da en, “Aw yan, anak mi adi sa et tet-ewa ay nagodab sin binmalaana.