Juan 9:3-40

³Timaba si Jesus, “Kenà lekat te kandin salà se pegkebota din. Kenà heman lekat te salà te amay aw inay din. Meneng bota sikandin amon pineokit kandin ipekità te metolos se Timanem.

⁴Dalem te doen pa aldaw, keilangan inangen tadon se ibeg te Timanem simogò kanak, so wedad meketerbaho te delem.

⁵Aw dini a pa te keneyonan, siaken se kelowahan eg-anyag diyà te pedowan te kedita te otaw te keneyonan.”

⁶Penga te peg-ikagi din kenyan, neneptep sikandin diyà te tanà, aw inlotek se ngingi diyà te tanà, aw insawol din diyà te mata te otaw bota.

⁷Minikagi sikandin, “Doton ka te lanaw iningedanan Siloam, aw onawi se bawa no kidoen.” (Se kelebadan te Siloam, yan se kagi “impeibing.”) Penga niyan, dimoton se otaw bota aw migdàpog. Peg-olì din, kimità den.

⁸Nepela se menge otaw simbalay din aw otaw tapay kimità kandin egpemoyò, aw minikagi dan, “Sikandin se gayed egpenenoo aw metipemoyò.”

⁹Doen otaw minikagi, “Sikandin goman iyan.” Meneng doen doma otaw minikagi, “Kenà sikandin. Tabag olò onawa se bawa dan.” Meneng minikagi sikandin, “Siaken se bota.”

¹⁰Mig-insà dan, “Aw sikona se bota, eden lay se neinang te kimità ka den?”

¹¹Timaba sikandin, “Doen otaw ngadan din si Jesus neneptep diyà te tanà aw inlotek din se ngingi din diyà te tanà, aw insawol din diyà te mata ko, aw insogò a din doton te Siloam amon megdàpog a te bawa ko. Timolò a kandin, aw yan kimità a den.”

¹²Mig-insà dan, “Kenan lay den sikandin?” Timaba se otaw, “Inday. Wedà ko ketegahi.”

¹³Penga niyan, inibing dan se otaw negolì se mata din doton te menge Parisiyo.

¹⁴Aldaw te peg-etod te menge Judiyo se aldaw te peglotek i Jesus te ngingi diyà te tanà aw migpegolì te mata te otaw bota.

¹⁵Mig-insà heman se menge Parisiyo diyà kandin aw nemeno se pegkegolì te mata din. Mig-indan sikandin, kagi din, “Insawol din se pasak diyà te mata ko, aw migdàpog a te bawa ko, aw yan kimità a.”

¹⁶Penga niyan, doen menge Parisiyo minikagi tepad ki Jesus, “Kenà sikandin insogò te Timanem, so eglàpang sikandin te punù tepad te aldaw te peg-etod.” Meneng doen menge doma otaw minikagi, “Simpana sikandin se metilàpang te punù, eked sikandin pekebatog meg-inang te menge kepelahan iling kani.” Yan migpedindilay dan.

¹⁷Penga niyan, mig-insà dan diyà te otaw negolì se mata, “Eden lay se kamno aneng-aneng tepad kandin? So kamno mata se pinegolì din.” Timaba sikandin, “Telekeliwat sikandin te kagi te Timanem.”

¹⁸Wedà pemenal se menge obanen te Judiyo te tapay sikandin bota aw negolì den se mata din, aw yan impeangay dan se amay aw inay din.

¹⁹Pegdateng dan doton, mig-insà dan kandan, “Batà niyo lay se otaw seini? Bota lay sikandin lekat te pegtebaw din? Nengà lay sikandin kimità den?”

²⁰Timaba se amay aw inay din, “Netegahan day te sikandin se batà day, aw netegahan day heman te bota sikandin lekat te pegtebaw din.

²¹Meneng wedà day ketegahi aw nengà lay sikandin kimità den. Wedà day heman ketegahi aw sinu se migbolong kandin. Meneng mèpiya aw sikandin se insaen niyo, so dakel den sikandin. Sikandin se meketaba te menge insà niyo.”

²²Yan se inikagi te amay aw inay din, so nelemitan dan te menge obanen te Judiyo. Tapay migsebad se menge obanen te eked den dan peopi te simbahan se otaw mikagi te si Jesus se Misiyas.

²³Yan se doun te minikagi se amay aw inay din, “Dakel den sikandin. Mèpiya aw sikandin se insaan niyo.”

²⁴Yan todà dan impeangay se otaw negolian te mata din, aw minikagi dan, “Na, peg-indan ka den te benal, so kinità ka den te Timanem. Netegahan day den te limàpang sikandin te punù ingkeliwat i Moises.”

²⁵Timaba se otaw, “Wedà ko ketegahi aw benal aw kenà benal te sikandin se limàpang te punù ingkeliwat i Moises. Meneng sebad olò se netegahan ko, te bota a kedengan, meneng egpengità a den songkani.”

²⁶Minikagi dan, “Eden lay se ininang din kamno? Pigmeno lay se pegbolong din te mata nikaw?”

²⁷Timaba sikandin, “Tapay ko iyan in-indan kenyo, meneng wedà kaw penenalan. Meibeg kaw lay domineg todà kenyan amon meinang kaw tinoledaan din?”

²⁸Pegdineg dan kenyan, neopal dan, aw minikagi dan, “Sikona se tinoledaan din, meneng sikami se tinoledaan te telekeliwat te kagi te Timanem gebii si Moises.

²⁹Netegahan day te si Moises se insogò te Timanem. Meneng otaw sìyan, wedà day ketegahi aw sinu se simogò kandin.”

³⁰Minikagi se otaw negolian, “Ontò a den nepela kenyo. Pengkey migpegolì sikandin te mata ko pineokit te tolos din, meneng wedà niyo pa ketegahi aw sinu se simogò kandin.

³¹Netegahan tadon te kenà egtebangan te Timanem se otaw eglàpang te punù. Meneng se otaw egsimba te Timanem aw egtolò te ibeg din, yan se egtebangan te Timanem.

³²Lekat te ketebò te keneyonan lamig seini, wedad palos otaw netegahan tadon nekebatog migpegolì te mata te otaw bota lekat te pegtebaw din.

³³Simpana kenà sikandin insogò te Timanem, wedad palos kepelahan mebatog din inangen.”

³⁴Minikagi dan, “Pegtebaw no, bota ka so doen salà nikaw. Yan eked kepakay aw sikona se megtoladà kenami.” Penga niyan, impelowà dan sikandin lekat te simbahan.

³⁵Pegdineg i Jesus te impelowà dan lekat te simbahan se otaw negolian, pinengemahà din sikandin. Pegkità din kandin, mig-insà si Jesus, “Nemenal ka lay te doen Timanem Migpekeotaw?”

³⁶Timaba sikandin, “Sir, indani a aw sinu iyan amon memenal a kandin.”

³⁷Minikagi si Jesus, “Kinità no den sikandin, so se minikagi diyà kamno, siaken iyan.”

³⁸Minikagi se otaw, “Pengolo, nemenal a den kamno.” Penga niyan, migsimba sikandin ki Jesus.

³⁹Minikagi si Jesus, “Insogò a dini te keneyonan amon ipekità ko se awop te pedowan te kedita te otaw. Se otaw iling te bota so wedà dan kità te kebenalan, yan se tebangan ko amon komità dan. Meneng se otaw eden dan aw kimità dan te kebenalan, yan se pekitaan ko te iling dan te otaw bota.”

⁴⁰Doen menge Parisiyo medapag kandin aw dimineg dan te kagi din, aw minikagi dan, “Bota kay lay heman?”