Juan 9:3-40

³Jesús na e-sapingan-abin sogded: —We, degine, e-babgan, amar iskussurmalad. We ibya-suli-gwalulesad, adi Bab-Dummad-ibmar-imaked we-dulegi oyolegegar.

⁴Igi dulemar ibgi arbae, ar mutik nonikir, geg dule bar arbaed. An deyobmodo, amba ibgi ibagan-naidgi dule-an-barmialid-arbaed an imaker-gebed. Ar an bemargi bangudogu, mutikidyob guoed, bar an ibmar-imakosulid.

⁵Ar emigi we-napneggi an gudiidgi, ani an we-napneggi-dulemar-bukwadga igar-napiragwad oyonaid, gwallu-meegwadyob an gued.

⁶Jesús degi-sogsad-sorba, napagi wiaksagu, napa olli-olli wiigi imaksad, degine, e-gogi olli-ollid wesgu, dule-ibyagi mage-mage imaksabalid.

⁷Geb degi Jesús dule-ibya-sulidga sogded: —Dii-wilasar-naidse, Siloé-nugadse be ibya na enukna. (Siloé sogleged, Barmilenaid.) Degi dule-ibya-sulid nadsun ibya enukega. Ibya enuksagu, nonikid bato sunna mag-atake.

⁸E-neg-dikarba-mamaid, degine, dule-ibya-suli-gudidaed-mag-dakmaladi sogdemalad: —¿Ar we dule-ibya-suli, degine, wilegedi, mani aimarse egisdidaedsursi?

⁹Abar sogmalad: —We a-duleye. Baigandi sogmarmogad: —Surye, binsa we sunnaa dakleye. Degi, na e-ibeddi soged: —Ani an a-duleye.

¹⁰Ese egichiarmarsunnad: —¿Igi nabir mag be atakgusa?

¹¹Dule-nugusad, abin-imakdegu, sogded: —Dule-wargwen, Jesús-nugadi, napa olli-olli imaksad, an ibyagi mage-mage imaksabalid, geb degi anga sokalid: ‘Siloése be nae, be ibya enukna.’ Agi an ase nade-gusad, an-ibya an enuksad, geb degi mag-atak an gunonisunnad.

¹²Geb degi ega sogdemalad: —Ar degite, ¿bia Jesús nadsunna? Dule-nugusad abin-sogded: —An wichuli, bia Jesús nade.

¹³Fariseomarse dule-ibya-suli-gudigusad senonimalad.

¹⁴Deun obunnoged-ibagi Jesús napa olli-olli imaksa-gusad, dule-ibya-sulid a-ibagi onudaksa-gusad.

¹⁵Fariseomar dule-ibya-suli-gudigusadse egisdemarmogad: —¿Igi nabir be ibya nugusa? Dule-nugusad, abin-sogded: —Jesús an-ibyagi olli mage-mage imaksad, degi, ibya an enuksagu, mag-atak an gunonikid.

¹⁶Degi abar Fariseomar sogdemalad: —We-dule Bab Dummadgi danisulid, ar ade we-dule obunnoged-ibagi dule-nudaksad. Fariseo-baigandi sogmalad: —¿Ar dule iskudiile, we sunna ibmar-wilubgan-dakledisurmalad imakosi? Suli, geg imake. Na Fariseomar abin-abin imakarmarsunnad.

¹⁷Degi Fariseomar gannar dule-ibya-suli-gudigusadga sokarmalad: —Dule-bega-ibya-nudaksadgi ¿igi be sogmosunna? Dule-nugusad, abin-sogded: —Andi an soged, we Bab-Dummad-gaya-burba-berbeged-duleye.

¹⁸Ar Judiomardi we-dule-ibya-suli-gudigusad, ibya-emigindi-nikusad benmalad. A-ular dule-ibya-suli-gudigusad-e-babganse gochamarsunnad.

¹⁹Ese egisdemalad: —¿Ar we be-machi-sunnadi, we ibya-suli gusgu gwalulesadi? ¿Ar degite ibiga emigindi nabir ataksunna?

²⁰E-babgan sogdemalad: —Anmar wisi, we anmar-machid, ibya-suli gwalulesad.

²¹Ar emigindi mag-atakeddi an wichurmalad, ibiga nabir mag-atake. Anmar wichurbalid, ar doa ega nabir ibya nudaksa. Ar bato dummadsoggu, ese be egismar, na e bemarga sogoed, doa ega ibya nudaksa.

²²Dule-ibya-suli-gudigusad-e-babgan Judiomar-dummagan-dobedbali weyob sogsagusmardo, ar ade Judio-dummagan bato igar-itosmalad, ar dule-wargwen sog-dibeye Jesús we-dule-Bab-Dummad-dule-wargwen-barmidagoye-sogsad-duleye, Judiomar-onmaked-neggi onomaloye.

²³A-ulale dule-ibya-suli-gudigusad-e-babgan sogsa-gusmalad: “Bato dummadsoggu, ese be egismar, doa e-onudaksa.”

²⁴Degine, Fariseomar dule-ibya-suli-gudigusadse gannar gochamargu, ese egisdemalad, ega sogdemalad: —Bab-Dummad-asabin napiragwadba be anmarga sogmalo igi be nugusa. Anmardi wismalad we-dule, dule-iskanad. ¿Bedi igi be sogmosunna?

²⁵Degi, dule-nugusad, abin-imakdegu, sogded: —An wichulid, we dule-iskudiid-dibe. Unnila ibmar-soggwennaa an wisid, iduardi aku an atakenad, emigindi mag an ataked.

²⁶Fariseomar gannar dule-ibya-suli-gudigusadse egichiarmarbalid: —¿Igi-be-imaksa? ¿Igi nabir bega ibya nudaksa?

²⁷Dule-nugusad, abin-sogded: —Ar bato bega an sogsamalad, be an-itosurmalad. ¿Degite ibiga gannar be itobimarsunna? ¿Ar bemar e-sapinganga gubimarmosi?

²⁸Fariseomar dule-ibya-suli-gudigusadse uluarmalad, ega sogdemalad: —Bedi Jesús-e-sapindo, anmardi Moisés-e-sapinganmalad.

²⁹Anmardi wisid, Bab Dummad Moisésga sunmaksad, we-duledi, anmar wichulid, bia daniki.

³⁰Dule-ibya-suli-gudigusad abinsadgu, sogded: —¡Ar deyobi! ¡We ibmar nue aku-itolegeddo, bemardi wichurmalad we-dule bia daniki, degite angardi ibya nudaksad!

³¹Ar anmar wisid, Bab Dummad dule-iskudimalad ese gollalile, itosur-daed. Ar dule-wargwen Bab-Dummad-dobee nanadiirdi, degine, Bab-Dummad-sogedba ibmar imakdiirdi, Bab Dummad a-dule ese gollalile, adi ito-daed.

³²Ar bipisaale, gebe-negasailaunni, gwen itoledisulid, dule-gusgu-muu-neggi ibya-suli gwalulesad, dule-wargwen a-dulega ibya nudaksa-deeye.

³³We-Jesús Bab Dummadgi danisulina, gege deyob ibmar imakenad. Ar emigindi deyob ibmar-imakdisoggu, we-Jesús Bab-Dummad-akar danido.

³⁴Fariseomar abinsadmargu, ega sogdemalad: —Be dule, be iskuedgi gwalulesadde, ¿be anmar-odurdakde? Be anmar-odurdakedsulid. Degi, Judiomar-dummagan dule-ibya-suli-gudigusad, Judiomar-onmaked-neggi onosmarsunnad.

³⁵Jesús itoargu, Fariseomar Judiomar-onmaked-neggi dule-ibya-suli-gudigusad-onosmarye, Jesús a-dule-amisgu, ega sogded: —¿Bab-Dummad-Machigi be bensuli?

³⁶Dule-nugusad, abin-imakdegu, sogded: —Dummad, ¿doa-dule-sunna, adi an mer egi benguegar?

³⁷Jesús, abin-sogded: —A-dule be daksad, bebo sunmakgwichid, ani an Bab-Dummad-Machid.

³⁸Dule-ibya-suli-gusad, abin-sogded: —Dummad, an begi bensulid. Geb degi yokorgi sindigar Jesús-abin sigisgu, igi Bab Dummadse gollege e-nug odummogegar, deyob Jesús-nug odummodmogad.

³⁹Jesús sogded: —We-napnegse an nonigu, dulemar bachik-bachik-urbega an nonikid. Dulemar-aku-atakdimalad mag-atak saegar, degi, dulemar-mag-atakdimalad, aku-atak imakegar.

⁴⁰Degine, Fariseomar-gwenna-gwenna Jesús-walik gwichimalad, Jesús degi-soge itosmargu, ega sogdemalad: —¿Ar anmarmode, aku atakmarmosi?