Juan 9:3-25

³Y che e Jesús: —Pues majax umen umabꞌambꞌanirach jaxir que cuxpa tajpem ut y nien majax umen umabꞌambꞌanir utata o utuꞌ. Cuxpa tajpem unacꞌut tuaꞌ achecsuna ucꞌotorer e Dios.

⁴Y non ucꞌani tuaꞌ cache lo que ucꞌani jaxir xeꞌ uyebꞌta tarien conda janchꞌaquento, porque watar e hora conda axin acbꞌare conda mix majchi uyubꞌi apatna.

⁵Pues conda nen turento tara tor e rum nen jax e janchꞌaquenaren tut tunor e gente, che e Jesús.

⁶Conda cꞌapa ojron cocha era, utujbꞌa uyar utiꞌ tut e rum tuaꞌ uche imbꞌijc anam tamar y uturbꞌa tama unacꞌut e winic xeꞌ tajpem unacꞌut.

⁷Y uyare e winic y che: —Quiqui poco unacꞌoit tama e pila xeꞌ ucꞌabꞌa Siloé, che e Jesús. Pues e ojroner Siloé war che: “Ebꞌetbꞌir” tama e ojroner hebreo. Entonces ixin e winic tuaꞌ upoqui unacꞌut bꞌan cocha arobꞌna umen e Jesús, y conda sutpa yopa tut e Jesús, uyubꞌi ixto eꞌron unacꞌut yaꞌ.

⁸Entonces conda irna e winic era umen cora upiarobꞌ y umen tin e unata que tajpem ani unacꞌut cay ojronobꞌ jaxobꞌ taca y chenobꞌ: —¿Ma ca jax e winic era xeꞌ acay ucꞌajti e tumin? che e gente era jaxobꞌ taca.

⁹Y ayan tin e war chenobꞌ: —Jax e winic era, chenobꞌ. Y ayan e inmojr xeꞌ chenobꞌ: —Majax jaxir, pero lar uwirnar, chenobꞌ. Pero jaxir che: —Nen, che e winic xeꞌ tajpem ani unacꞌut.

¹⁰Y ayan tin e cay uyubꞌiobꞌ tuaꞌ e winic y chenobꞌ: —¿Y tucꞌa ache tuaꞌ uyubꞌiet iyeron? che cora winicobꞌ era.

¹¹Y che e winic: —Jax inteꞌ winic xeꞌ ucꞌabꞌa Jesús xeꞌ ugoro e anam tama unacniut y uyaren: “Quiqui poco unacꞌoit tama e pila xeꞌ ucꞌabꞌa Siloé.” Y nen ixien inche bꞌan cocha uyaren. Y conda cꞌapa impoqui unacniut, eꞌron niut, che e winic era xeꞌ tajpem ani unacꞌut.

¹²Entonces ubꞌna tuaꞌ e winic era y arena: —¿Y tiaꞌ turu e winic xeꞌ utzꞌacpes unacꞌoit coner? che e gente era. Y jaxir che: —Nen machi innata tiaꞌ turu, che e winic.

¹³Entonces uqꞌuechiobꞌ ixin e winic era xeꞌ tajpem ani unacꞌut tut e fariseobꞌ.

¹⁴Pues jax inteꞌ día tuaꞌ e jiriar conda chena tunor era umen e Jesús; que uche e anam tuaꞌ utzꞌacpes e winic xeꞌ tajpem ani unacꞌut.

¹⁵Entonces e fariseobꞌ cay uyubꞌiobꞌ tuaꞌ e winic que tucꞌa uche que uyubꞌi eꞌron coner. Y jaxir che: —Anam ugoro tama unacniut y uchien impoqui y umen era cay eronen, che e winic.

¹⁶Entonces cay ojron cora fariseobꞌ y chenobꞌ: —Pues chequer ticoit que e Jesús majax ebꞌetbꞌir umen e Dios cocha machi acꞌupseyan tut e día tuaꞌ e jiriar, che e fariseobꞌ era. Pero ayan e inmojr fariseobꞌ ubꞌan xeꞌ chenobꞌ: —Jay jax ani inteꞌ ajmabꞌambꞌanir ma cocha erer uche inteꞌ nuxi milagro cocha era, che e inmojr era. Y tamar era cay uxere ubꞌobꞌ tamar e Jesús.

¹⁷Entonces cay uyubꞌiobꞌ otronyajr tuaꞌ e winic xeꞌ tajpem ani unacꞌut y chenobꞌ: —¿Y tucꞌa abꞌijnu net upater tin e utzꞌacpes unacꞌoit? che e nuquir winicobꞌ era. Y jaxir che: —Nen inware que jax inteꞌ profeta, che e winic.

¹⁸Pero e nuquir winicobꞌ machito ucꞌupsiobꞌ que e winic era tajpem ani unacꞌut. Y tamar era ixin upejcobꞌ utata y utuꞌ e winic

¹⁹y uyubꞌiobꞌ tuobꞌ y che: —¿Isitz ca era? ¿Tajpem ca ani unacꞌut conda cuxpa? ¿Y tucꞌa uche tuaꞌ uyubꞌi eꞌron coner? che e nuquir winicobꞌ era.

²⁰Y ojronobꞌ utata y utuꞌ e winic y chenobꞌ: —Canata que jax casitz era y que tajpem unacꞌut conda cuxpa.

²¹Pero non machi canata tucꞌa uche tuaꞌ uyubꞌi eꞌron coner, y machi canata chi umen erojsena unacꞌut. Ubꞌinic nox tuaꞌ jaxir tuaꞌ inata tama tunor era cocha jaxir nojta winiquix xeꞌ erer uchecsu ubꞌa tiut, che utata y utuꞌ e winic xeꞌ tajpem ani unacꞌut.

²²Pues ojronobꞌ cocha era utuꞌ y utata e winic xeꞌ tajpem ani unacꞌut umen que war ubꞌacriobꞌ e nuquir winicobꞌ porque jaxirobꞌ ojronobꞌix que cꞌani ulocsiobꞌ tama e sinagoga tunor tin e war ubꞌijnuobꞌ que e Jesús jax e Cristo.

²³Y tamar era arobꞌnobꞌ umen utata e winic que: “Ubꞌinic nox tuaꞌ jaxir tuaꞌ inata tama tunor era cocha jaxir nojta winiquix”, xeꞌ arobꞌna umen utata e winic era.

²⁴Entonces e nuquir winicobꞌ sutpa upejcobꞌ e winic xeꞌ tajpem ani unacꞌut otronyajr y chenobꞌ: —Arenon tin xeꞌ erach tut e Dios. Porque non canata que e Jesús jax inteꞌ ajmabꞌambꞌanir, che e nuquir winicobꞌ era.

²⁵Entonces ojron e winic xeꞌ tajpem ani unacꞌut y che: —Nen machi innata jay ajmabꞌambꞌanir o jay machi. Ajrer taca innata que tajpem ani unacniut y que coner uyubꞌien enron, che e winic.