JUAN 9:28-40

²⁸Lex wninyaan men lo mgyeey guin, re men: ―Laa de xpén men nak de, per le noo yra noo xpén Moises nak noo.

²⁹No nan noo ne Dëdyuzh wnii lo Moises. Per le mén gwa, ni nandet noo gan pa wzaa men.

³⁰Orguin wke mgyeey guin, re men: ―Te gyelgwzee nak negwa ne nandet de gan pa wzaa men, no laa men wlaa ne wyenii bzalo noo.

³¹Nanwen be ne rkagyedyagdet Dëdyuzh xdiiz mendol, sinke le Ne rkagyedyag nonchee xdiiz mén ne ron xdiiz Ne no ne rlaa ne rlaan Ne.

³²Nunk gardet gyen xdiiz te mén ne ylaa ne gyenii bzalo te mén ne cheguel ngwlëë axtegue chene wal.

³³Belne let Dëdyuzhdet wxaal men, bet nyundet men gan nlaa men.

³⁴Lex re men lo mgyeey guin: ―Laa de axtegue ne wal de, kesentyent neey de dol; ¿pezee ne yneluu de noo? Orguin wboo men mgyeey guin lenydoo.

³⁵Waknan Jesus ne wboo men mgyeey guin lenydoo, lex chene wzëël Ne men, re Ne lo men: ―¿Pe rlaleedx de XPee Dëdyuzh?

³⁶Lex re mgyeey guin lo Ne: ―Dechey, guzëët gan txuzh ne, chen ylaleedx noo zhaa.

³⁷Wke Ne re Ne: ―Che wii de zhaa. Laa zhaa nee kayuno de diiz.

³⁸Orguin wzuzhib mgyeey guin lo Ne, lex re men: ―Rlaleedx noo de, Dechey.

³⁹Lex re Ne: ―Zëëd noo nee gyëzlyuree chen gak gyelextis, chen gyenii bzalo menngwlëë, le yra men ne rwii gak men zegnak menngwlëë.

⁴⁰Ne won tebëd men ne nak farisew ne ndxin nga ne re Ne zenga, re men lo Ne: ―¿Peguin no noo nak ngwlëë?