Juan 9:26-41

²⁶—¿Ma'ta' onpotahuatënquën, anoyarayatërinquën? itaantapi.

²⁷—Nani sha'huitopiranquëmahuë', co yanatëramacohuë'. ¿Onpoatomata' naquëranchin yanatantaramaco? ¿Canpitanta' Quisoso yaimarama' ti? itërin.

²⁸Napohuachina, chiníquën no'huipi. —Quëmari imasaran. Co quiyaso' nohuantëraihuë'. Moisësë imarai.

²⁹Yosëri iráca Moisësë nontërin. Quisososo nipirinhuë' intohua quëranso' huë'mara. Co nitotëraihuë', itopi.

³⁰—¡Ma'pitacha tënama paya! Intohuaransona huë'ninso canpitaso co nitotopiramahuë', caso' anoyarayatërinco.

³¹Oshahuano'sari Yosë nontohuachina, co natanatonhuë', co catahuarinhuë'. Nipirinhuë', Yosë chinotohuatëhua', noya natëhuatëhua', natanarinpoa'. Ina nitotërëhua'.

³²Somaraya hua'huatohuachina, co onporonta' anoyarayatochinpihuë'.

³³Co Yosë quëran o'marinhuë' naporini, co anoyarayachitoncohuë', tënahuë, itërin.

³⁴—Quëmaso' hua'huatapon quëran huarë' oshahuanaponahuë', ¿yaa'chintërancoi ti? itopi. Ina quëran ocoirahuatona', a'papi huachi.

³⁵Hua'ano'sari ocoirinso' natantahuaton, Quisoso pa'nin yonípon. Quënanconahuaton, itërin: —Quëmapi Yosë quëran o'marinso' ¿natëran ti? itërin.

³⁶—¿Inta' Sinioro inaso'? Yanatëpirahuë', itërin.

³⁷—Nani ni'nanco. Ca mini, nontaranquënso', itërin.

³⁸—Natëranquën Sinioro, itahuaton, isonin quëran Quisoso chinotërin.

³⁹Napotohuachina, Quisosori itërin: —Isoro'paquë o'marahuë piyapi'sa' no'tëquën sha'huita'huaso marë'. Somarayaro'sa nipisopita anoyarayatarahuë. Napoaponahuë': “Quiyaso noya ni'tërai topisopitaso', asomarayatë pochin nitarahuë,” itërin.

⁴⁰A'naquën parisioro'sa' inaquë huanirahuatona', Quisoso natanapi. —¿Napoahuarë quiyanta somarayacoi? itopi.

⁴¹—Somarayanquëma naporini, co oshahuaintomahuë'. Nipirinhuë', “co quiyaso somarayacoihuë',” tënamaso marë' oshahuanama'. Ina marë' Yosë ana'intarinquëma', itërin.