Juan 9:24-32

²⁴Entonces e nuquir winicobꞌ sutpa upejcobꞌ e winic xeꞌ tajpem ani unacꞌut otronyajr y chenobꞌ: —Arenon tin xeꞌ erach tut e Dios. Porque non canata que e Jesús jax inteꞌ ajmabꞌambꞌanir, che e nuquir winicobꞌ era.

²⁵Entonces ojron e winic xeꞌ tajpem ani unacꞌut y che: —Nen machi innata jay ajmabꞌambꞌanir o jay machi. Ajrer taca innata que tajpem ani unacniut y que coner uyubꞌien enron, che e winic.

²⁶Pero sutpa uyubꞌiobꞌ tuaꞌ e winic otronyajr y chenobꞌ: —¿Y tucꞌa uche tacaret? ¿Y tucꞌa uche tuaꞌ uyerojse unacꞌoit? che e nuquir winicobꞌ.

²⁷Y jaxir che: —Nen inwareoxix tama tunor era pero nox machi cꞌani icꞌupse lo que cay inwareox. ¿Tucꞌa tuaꞌ war icꞌani tuaꞌ insutpa inwareox otronyajr? ¿O war ca ibꞌijnu tuaꞌ ixquetpa ajcanuarox tuaꞌ ubꞌan? che e winic xeꞌ tajpem ani unacꞌut.

²⁸Entonces e nuquir winicobꞌ cay ucꞌayobꞌ e winic xeꞌ tajpem ani unacꞌut y chenobꞌ: —Net ajcanuaret tuaꞌ e Jesús, pero non ajcanuaron tuaꞌ lo que chꞌar tzꞌijbꞌabꞌir umen e Moisés.

²⁹Non canata que e Dios cay ojron taca e Moisés, pero e Jesús nien machi canata tiaꞌ tari, che e nuquir winicobꞌ.

³⁰Entonces e winic che: —Pero ¿tucꞌa tuaꞌ que machi war inata tiaꞌ tari jaxir? Pues jax jaxir xeꞌ uyerojse unacniut.

³¹Tunoron canata que e Dios machi uyubꞌi lo que cꞌajtna umen tin e ajmabꞌambꞌanir. E Dios ajtaca uyubꞌi lo que acꞌajtna umen tin e erach uwirnar y umen tin e uche lo que ucꞌani jaxir.

³²Ma tiaꞌ coybꞌi achecsuna jay ayan inteꞌ xeꞌ uyubꞌi utzꞌacpes inteꞌ xeꞌ cuxpa tajpem unacꞌut.