Juan 9:21-32

²¹—Juhua aba. ¿Eje bucha capetatie cuana taa tu juhua? Baecua yatse aira tuque capetatishahuaque. Tuquetu amena esiri. Ebacua piji ama tuque. Ita nebacaduracue tuque. ¡Eje bucha cacuejatimaedyatu juma! —jadya tuna etataque ecatsera acuare.

²²Tatsejatu inime jucuare: —Ecuanaja huaraji cuanatu juchine: “Nubitaqui amatu caradati ishuque etareju ‘Jesús tu Yusuja Emepeque’ jadya ejenequi juyaque”. Jadya tibudya tatse huaraji cuana mubatsu jadya caquemitsaticuare.

²³Jadya tibudya tuna ecuaque etataque ecatsera jadya acuare: “Ita taa nebacaduracue. Tuquetu amena esiri. Ebacua piji ama tuque”.

²⁴Yudijidya ihuaranuca tuna anucacuare capetatihuaque. —Tuyu ecuana cuejacue, Yusura mira dutya quisarati ayaque bacayaque adebatsu. Ecuana ecuana bahue mique capetatishaqui juhuaquetu jucha aridaque. ¿Jadidya?

²⁵—Ique baecua tuque juchaqui, juchama jadique. Camadya ique bahue. Ique yuequedya shuhui capetatiyaque ama tura capetatishahua, —jadya tujatu ecana acuare.

²⁶Yudijidya bacadura tunajatu anucacuare tumeque ecuita: ¿Eje bucha capetatishae cuita turami ahua? —jadya tunajatu acuare.

²⁷—Amena micuana cueja beta ahua. Ejenecarama micuanara aya. ¿Aishu jatsu micuana yudijidya cuejanuca cuejanuca eau? ¿Micuana ni taa micuana junenicaradya juya tuatsehue? —jadya tuna ecuitara acuare.

²⁸Ecahuaiti tuna jucuare tuatsehue. Ijillahuanacuare tunaja tuque. —¡A, aijama! Ecuana ecuana tuatsehue junenicarama juya. Mique taa tuatsehue junenicue, ecuana aijama. Ecuanaratu ejeneya Moisésra huenecuareque camadya.

²⁹Ecuana ecuana bahue Yusu Moisés eque quisaraticuareque. Jesús bacue ecuana adebaya ama ni riya piji buchique, ni ecuana bahue aira cuadishahuaque, —jadya tunajatu acuare.

³⁰Ecuitara tuna jadya anucacuare: —Micuana micuana dyaque inime adebabada cabatiya. Jadya ama bucha micuana baecua aira cuadishahuaque. Baecua micuana ejuque tuque jehuaque ique capetatishaquique. ¡Era taa bape baya, micuana tuque ejuque baecua baatsu!

³¹Ecuana ecuana bahue, Yusura juchaquique tuatsehue quisaratiyaju bacayaque ama. Turatu bacaya tuja biji eque aniya cuanaque cuita camadya. Tuque muiqui cuanaque camadya tujatu ecana bacaya.

³²Yahua nanada equeque riyaque huecaca tuputu ni ejejadya jutidya ecapetatishau shuhui cuanaque. Jadya ama bucha Jesúsra iyacua capetatishahua.