Juan 9:2-22

²Tegidgin e-chapingan Jesúszhe ekichialmal: —Tule-oturdaked, ¿we tulede, toa-iskuedbal mimmilejad-akar aku-ata-wede? ¿E-pabganbal o aga tukin?

³Tegin Jesús aga e-chapinganga chogal: “Chulá. We tule e-iskuedgin aku-kwen-atajul, tegin e-pabgan-iskuedgin pel chulbal. ¿Ibiga we tulega weob kus? Nabir. Imi Pab-Tummad-immal-taktijulid-imaked, we tulebal mag taklenonigal.

⁴“¿Ibiga pe wisgubimal-ade, we tule igi kus? Imi tule ampa neg-taledgin e-tummadga arpagenab. Tenal neg-mutikid tanikil, tule mag pal kwen takojul-kuo e-tummadga arpagal. Al an ampayo purkweddu, tegin ampa an igal-nikadgin, anmal Pab-Tummad-an-palmialidga arpagenabmal.

⁵Tenal an iti-napkin ampa kudiidgin, an tule-iti-napkin-pukmaladga igal-chunchunnad oyonai, tadgwa neg-otalonaidyob.”

⁶Tegin Jesús e-chogzhad-cholbal napkin kwi-akcha, tegin nap-kwibied wes. Tegin Jesús olma-olma nap imas. Tegin Jesús kep tule-aku-ataged-imiagin yan-yan-yan olli imas.

⁷Tegin Jesús tule-aku-atagedga chogal: —Imisgin pe naddo, Siloé-ti-tummad-wilagwal-chiidzhe, imia enukkal. (Imi Siloé choglege: Palmilegalid.) Tegin tule-aku-ataged nadzhun Siloé-ti-chiidzhe imia enukkal. Tegin tule aga imia enusgu, kannan akpirisgu, imia mag atanonijun.

⁸Tegin tule-e-neg-tikalbal-mamimalad tegin tule-mani-ekichi-tar-taktimalad aga emal-emal ekichialmal: —¿We tulede anmal taktijulzhí, mani ekichii?

⁹Tegin tule-wal-walgwen chogalmal: —A-tuledo. Tegin tule-pimalad chogmalmo: —Chulá. We-tule ajuli, pinche ayob-taklege. Tegin tule-nabir-atanonikid aga tukin chogal: —Antin, an mani-ekichii-taed-tuledo.

¹⁰Tegin tulemal, tule-nabir-atanonikidga chogalmalzhun: —¿Pe igi nabir atanoni-adé?

¹¹Tegin tule-nabir-atanonikid tulemalga chogal: —Imi tule-Jesús-nugad napkin kwi-akchagu, olma-olma nap-imas, tegin an-imiagin yan-yan-yan olli-imas. Tegin Jesús anka chogzhado: ‘Pe nad, Siloé-ti-chiidzhe imia enukne.’ Tegin an nadzhun imia enukkal. Tegin an imia enusgu, an nabir atanonijun.

¹²Tegin tulemal, tule-nabir-atanonikidzhe ekichialmal: —¿Imide tule-pe-nudajadde pia naddé? Tegin tule-nabir-atanonikid tulemalga chogal: —An wichí pia nad.

¹³Tegin tulemal Pariseomalzhe tule-nabir-atanonikid-chesmal oyogal.

¹⁴Imi teun takalgu, Jesús ulukued-ibegin tule-aku-atagedga imiagin yan-yan-yan olli imas, tegin we tulega nabir imia atanonijun.

¹⁵Tegin Pariseomal tule-nabir-atanonikidzhe ekichialmalzhun: —¿Pe igi nabir atanoni-adé? Tegin tule-nabir-atanonikid Pariseomalga palchogalzhun: —Imi tule an-imiagin yan-yan-yan olli imasgu, an tigin imia enus. Tegin an-imia nabir atanonijun.

¹⁶Tegin Pariseomal-wal-walgwen chogalmal: —Imi tule-pe-nudajad, Pab-Tummad-akar kwen tanijul. ¿Ibiga an teob chog? Imi we tule ulukued-ibe-igalgin kwen ataszhul. Tenal Pariseomal-pimalad chogalmal: —Chulá. ¿Imi tule-iskued-nikad igi kuneé, weob immal-taktijulid imagal? Keg kue. Imi teun Pariseomal aga yopí kwen chogzhajulmal.

¹⁷Tegin Pariseomal kannan tule-nabir-atanonikidzhe ekichialmalbal: —¿Imi tule-pe-imia-nudajadgin, pe igi chogmójun? Tegin tule-imia-nugujad Pariseomalga chogal: —Imi tule-an-imia-nudajad, Pab-kaka-palchoged.

¹⁸Tenal Pariseomal we tulegin kwen ibzhaszhulmal, we tule akpene aku-atage-nad, tenal imisdin mag atanoni. Al Pariseomal tule-nabir-atanonikid-e-pabganzhe kochamal. Tegin e-pabgan nonimalgu, Pariseomal e-pabganzhe ekichialmal chogalmal:

¹⁹—¿Imi we, pe-machiyé? Tegin machi-e-pab tule-tummaganga chogal: Eye, an-machido. Tegin Pariseomal ekichialmalbal: —Imi tulemal chogmal, pe-machide kusgu aku-ata mimmiles. ¿Nabir chogmal o chul? ¿Tede ibiga pe-machide nabir imia atanonijun?

²⁰Tegin machi-e-pabgan Pariseomalga chogalmalzhun: —Imi anmal wismaldo, wedin an-machi, tenal an-machi kusgu aku-ata mimmiles.

²¹Tenal anmal wichul, igi nabir imia-atanoni. Tenal an wichulbal, toa-tule an-machiga imia nudas. Tenal an-machi pato chered-choggu, al pe machije ekisdo. Tenal an-machi aga tukin pega chogo, toa e-nudas.

²²Imi teun Judio-tummagan pato igal-mezhismal, meke-ibi-tule Jesúsgin chogzhal, Jesús, Cristo-Pab-akpene-chogzhad-palmidagoed-tule, we tuledin Judio-ormaked-negzhe-naneed-akar kantikidgin tar-onomalo.