JUAN 9:2-15

²Huan tiimomachtijcahua tijtlatzintoquilijque: ―Tlamachtijquetl, ¿ajqueya itlajtlacol para elqui popoyotzi ne tlacatl? ¿Eltoya itlajtlacol inana o itata o san ya itlajtlacol?

³Huan Jesús techilhui: ―Amo tlacatqui popoyotzi pampa ya itlajtlacol, niyon pampa itlajtlacol inana, niyon itata. Tlacatqui quej nopa para monextis ipan ya catli Toteco ica ihueyi chicahualis hueli quichihua.

⁴Monequi nijchihuas nopa tequitl catli Toteco nechtitlantoc ma nijchihua amantzi quema noja tonaya huan onca hora, pampa san quentzi polihui para tlayohuiyas huan ayacmo aqui hueli tequitis.

⁵Ama quema noja niitztoc ipan ni tlaltipactli, niitztoc itlahuil ni tlaltipactli huan niquintlahuilijtos masehualme ipan inintlalnamiquilis.

⁶Huan quema quiijtojtoya ni camanali, Jesús chijchac huan quichijqui soquitl ica ichijchal huan quitlalili nopa soquitl ipan iixteyol nopa tlacatl catli popoyotzi.

⁷Huan quiilhui: ―Xiya, ximoixteyolpajpacati ipan nopa ameli catli itoca Siloé. (Siloé quinequi quiijtos: Tlatitlanili.) Huajca nopa popoyotzi yajqui moixteyolpajpacato huan quema mocuepqui, cuali hueliyaya tlachiya.

⁸Huajca nochi icalnechcahua huan nochi catli quiiximatiyayaj quema noja itztoya popoyotzi moilhuijque: ―¿Amo ni tlacatl yaya catli mosehuiyaya ojtipa huan motlaejehuiyaya?

⁹Huan sequin quiijtojque: ―Quena, yaya. Sequinoc quiijtojque: ―Amo ya, pero elisnequi quen ya. Pero nopa tlacatl iseltzi quiijto: ―Quena, na catli achtihuiya nieltoya nipopoyotzi.

¹⁰Huajca quitlatzintoquilijque: ―¿Quenicatza huelqui titlachixqui?

¹¹Huan quinnanquili: ―Se tlacatl catli itoca Jesús quichijqui soquitl, huan nechtlalili ipan noixteyol huan nechilhui ma niya nimoixteyolpajpacati ipan nopa ameli catli itoca Siloé. Huajca niyajqui huan nimoixteyolpajpajqui huan huajca huelqui nitlachixqui.

¹²Huan quitlatzintoquilijque: ―¿Canque itztoc nopa tlacatl Jesús? Huan nopa tlacatl catli eltoya popoyotzi quinilhui: ―Amo nijmati.

¹³Huan quihuicaque nopa tlacatl catli eltoya popoyotzi iniixpa nopa fariseos.

¹⁴Huan eltoya sábado nopa tonal quema tiisraelitame timosiyajquetzaj quema Jesús quichijqui soquitl huan quichicajqui nopa tlacatl, huan nopa fariseos moilhuijque eltoya se tequitl.

¹⁵Huajca inijuanti nojquiya quitlatzintoquilijque quenicatza huelqui tlachiya. Huan quinilhui: ―Nechtlalili soquitl ipan noixteyol huan nimoixteyolpajpacato, huan huajca nitlachixtejqui.