Juan 9:19-41

¹⁹zee mnabdizh xaa lo xaa: —¿Chelee xinn gu nak xaa ne? ¿Che nzho mod né gu lo nu, nen che syeg xaa ngol xaa? ¿Xomod nal, nzhola mod ngwii xaa?

²⁰Lee xuz xaa rop xnaa xaa mkeb nzhé: —Xgann nu nak xaa ne, nu sbaa ngol xaa;

²¹per nanet nu xomod nzho mod ngwii xaa nal, nixa nanet nu cho msekwen zaalo xaa. Leeka lo xaa bnabdizh gu nel grola xaa, nzho mod né xaaya lo gu.

²²Sbaa nzhé xuz xaa rop xnaa xaa nel nzheb xaa ne xaa re xaa non lo re xaa Israel, nel myaan re xaa koo xaa xaa lo re xaa nkasa nseed xtizh Dios, xaa kwaan yé lee Jesús nak Xaa Mxaal Dios Nabeyy.

²³Kwaanzee nzhé xuz xaa rop xnaa xaa: “Bnabdizh gu lo xaa, grola xaa”.

²⁴Lee re xaa non mbare mrezh xaa kwaan nak syeg yilo, nu nzhé xaa lo xaa: —Né lo nu kwaan wli delant lo Dios. Nel ne re nu lee xaa zee nak tub xaa nzeb jwalt.

²⁵Lee xaa mkeb nzhé: —Nanet na che nak xaa tub xaa nzeb jwalt, o nanakt xaa tub xaa nzeb jwalt. Per kwaan ne na nak, nanyanit zaalo na yilo, per nal nyanilaya.

²⁶Zee mbare re xaa ngunabdizh lo xaa: —¿Cho kwaan mle xaa lu? ¿Xomod mle xaa zee nguni zaalo lu nal?

²⁷Lee xaa mkeb nzhé: —Nguniila naya lo gu, per lee gu nanlet krera. ¿Chozhiin nzheklara gu zere naya stub welt? ¿O che noka re gu nzhekla reke tich xaa?

²⁸Zee lee re xaa mzelo myech lo xaa, nu nzhé xaa lo xaa: —Lu nreke tich xaabyi ba, per lee re nu nreke tich Ches,

²⁹nel ne re nu lee Dios ngunii lo Ches; per lee xaa ba nixa nanet nu pa naz nze xaa.

³⁰Lee xaa mkeb nzhé: —¿Xomod nak kwaane? ¿Chozhiin nanet re gu pa naz nze xaa, nel lee xaa msekwen garlo na?

³¹Nel ne re be nanzhont Dios xtizh xaa kwaan nzeb jwalt; nebse nzhon Dios xtizh re xaa kwaan ngwii lo xaa nu nle kwaan nzhekla xaa.

³²Nik tub welt zer zaa xaa kwent cheen tub syeg ngol nu nyanila zaalo xaa.

³³Nu chelee xaa ne nanzet kwent cheen Dios, nyent mod le xaa tub kwaan gro.

³⁴Zee nzhé re xaa lo xaa: —¡Lu nak tub xinn xto xaa! ¿Chozhiin nzhekla lu luu lu xana kwent wen lo nu? Nu mloo xaa xaa pa nseed re xaa xtizh Dios.

³⁵Jesús mbin lee re fariseo mloo xaa ngok syeg pa nseed re nu xtizh Dios; nu gorna mzhaal xaa xaa mnabdizh xaa lo xaa: —¿Che ngwii lu lo Xaa Mzhin Ngok Myet?

³⁶Lee xaa nzhé: —Né lo na, xana xaa zee, zee wii na lo xaa.

³⁷Jesús mkeb nzhé: —Ngunela lu lo xaa, nel na nak xaa, xaa kawdizh kwaan lu.

³⁸Zee lee xaabyi zee mkichxub lo Jesús, nu nzhé lo xaa: —Xaa Nabeyy, ngwii na lo lu.

³⁹Zee nzhé Jesús lo xaa: —Na nyal yizhyo ne zee naab na kwent; lee re syeg yani garlo nu lee re xaa nyani garlo gak syeg.

⁴⁰Lak fariseo nzo kwaan lee xaa, nu gorna mbin xaa kwaane mnabdizh xaa: —¿Napa noka nu nak syeg?

⁴¹Jesús mkeb nzhé: —Chol nak gu syeg, nankanot gu kulp cheen re jwalt cheen gu. Per nel né gu nyani garlo gu, nzhap gu kulp cheen re jwalt cheen gu.