Juan 9:17-37

¹⁷geru kadu dare kwian onbre gwagwa dodabage: —Onbre gdaite ba gwagwa dodadu, nege ba ten, ¿ba tañachuge mine ama giti? ¿Bage suge ama chema? Onbre e jaindunga Jesu giti: —Cha gerule ama giti ama kwian Chube gerua ketanga dabage.

¹⁸Onbre gerudu no ene Jesu giti agwa kwian fariseo ulita bai Jesu dollale me tadu kwian gwagwa dodaba kerua gakalin ulia ama medunga gwagwa me nege ama ñage ten, me chegu no alin kwian fariseoge, kwian fariseo onbre gwagwa dodaba ñenua, chebia kadu geru kadadale ñenuage chebiage ulia onbre medunga chebia kote gwagwa me,

¹⁹kwian fariseo geru kadu ñenuage ene: —¿Onbre ai ulia ba kirolla? Cha takalin ba gerule cha ole, ¿ulia ama medunga gwagwa me? Ulia ama medunga gwagwa me, ¿gire mineade ama ñage ten nege?

²⁰Ñenua gerudu mo kirolla gwagwa dodaba giti: —Cha ama ñenua, cha muira ama chebia, uñale cha bonatege ama medunga gwagwa me, ama cha kirolla ulia, cha ama manadu, jo juma me gwagwa molen.

²¹Agwa nege cha bonatege me uñale mineade ama ñage ten, kaire me uñale cha bonatege chema ama gwagwa dodadu. Ma no ba geru kade amage agali, ama juma, ama agali ñage gerule mo giti boidu mine gire ama ñage ten.

²²Ñenua, chebia gerudu ene kwian fariseo chrullale, uñadu ama bonatege kwian fariseo mneite nu mo ta gbaba ule salengwli kwian mlienga siere u mo litangwa Chube gerua jwanngwage kwian ulita bai kaire gerule no Jesu giti Jesu ulia Cristo Chube ama kagu kwian ulita alin. Kwian ulita bai kaire gerule ene kwian fariseo mneite gwa giti kwian fariseo be kwian ene mlienga siere, kwian ene me ñage mo lite dare ule ama kle mo lite ngwadi.

²³Malen ñenua gerudu kwian fariseo ole mo kirolla giti: “Ma no ba geru kade amage agali, ama juma, ama agali ñage gerule mo giti.”

²⁴Onbre gwagwa dodaba, kwian fariseo ama kadu nakwaite geru kadadale Jesu giti, kwian fariseo gerudu onbre gwagwa dodaba ole: —Ba gerudale no Chube giti Chube ba gwagwa dodadu, me onbre e ba kle tañachuge ama ba gwagwa dodadu, uñale cha ulitage onbre e agenga me no.

²⁵Onbre gwagwa dodaba gerudu fariseo ole: —Chage me uñale ama agenga me no o ama agenga no, agwa uñale chage trate cha tigedu gwagwa me cha me ñadu ten, agwa nege cha ten no, ama cha gbu ten.

²⁶Kwian fariseo geru kadu dare: —Onbre ba gwagwa dodadu, ¿ama agedu mine ba ole gire ama ba gbu ten?

²⁷Onbre gwagwa dodaba jaindunga: —Cha gerudu tanre ba ole onbre e giti onbre agedu mine cha ole, agwa ba me ta cha kerua gbakalin gdadi ulia. ¿Lledale ba takalin cha gerule nabitaite amaña giti? ¿Ba ta mo ta blitakalin ama ole ama gai ulia?

²⁸Kwian fariseo ulita skochiu onbre gwagwa dodaba ole ka bo ama ole: —Ba mo ta gbakalin onbre ba gwagwa dodadu gai dage, e ba mo ta gbakalin ama gai dage, agwa cha me dale, cha ulita diali be chage Moisés nu Chube gerua degaba alin gai dage.

²⁹Uñale cha ulitage Chube gerudu Moisés ole, malen cha Moisés chadalla degaba gai dage, cha age ama chadalla alin gerule kare. Agwa onbre e ba gwagwa dodadu me uñale cha ulitage ama chiu baini ama chema.

³⁰Onbre gwagwa dodaba gerudu kwian fariseo ole: —Me suge chage mineade me uñale bage ulia onbre cha gwagwa dodadu chiu baini.

³¹Uñale che ulitage Chube me kwian agenga me no keruchuge, agwa kwian ulita bai kaire Chube gai dage age Chube takalin kare, Chube kwian ene alin keruchuge.

³²Ni kwian gdaite jo keruchugaba gerule kwian na giti, kwian medunga gwagwa me kwian na ngwale ñage ama gwagwa gbe ten.

³³Onbre cha gwagwa dodadu, onbre e me chiu Chube ngwadi Chube me ama kagu, ene ama me ñadu age no ene cha alin cha gwagwa gbe ten, kwian ngwale me ñage age no ene daba alin, ama cha gwagwa dodadu giti suge chage Chube ama kagu.

³⁴Kwian fariseo ulita gerudu ta sko ole onbre gwagwa dodabage: —Ba medunga me gwagwa molen, ba kwian agenga me no, ¿nege ba ten gire ba ta cha ulita tkakalin tangle onbre e giti? ¿Ba chema gerudale ene cha ole? Ba me mo lite dare cha ole cha kle mo litege ngwadi, ba kwian me no, ¡joga siere u aige cha ulitage, cha me gwagekalin badi dare aini! Ama jo kagaba siere u kwian ulita kle mo lite ngwadige.

³⁵Kwian fariseo ulita onbre e kagu siere u mo litangwa Chube gerua jwanngwage chku uñale Jesuge, Jesu tendu onbre e amaña ngwange gire Jesu geru kadu amage: —Chube mo Kirolla kagu nga dba ai giti kwian kare, ¿ba ama gai ulia?

³⁶Onbre gerudu: —Gerule cha ole chema ba kle gerule giti, cha ta ama gakalin ulia.

³⁷Jesu gerudu: —Ba kle gwagedi, ba kle gerule ole, e cha amaña, cha giti cha kle gerule ba ole.