JUAN 9:17-30

¹⁷Huan sempa nopa fariseos quitatzintoquilijque nopa tacat cati mochicajtoya: ―¿Taya tiquijtohua ta ten yaya cati mitztachiyalti? Huan nopa tacat quiijto: ―Yaya se tajtolpanextijquet.

¹⁸Nopa israelita tayacanani amo quineltocayayaj sinta nelía nopa tacat eliyaya cati achtohuiya eltoya popoyotzi huan cati ama hueli tachiya, huajca quinnotzque inana huan itata.

¹⁹Huan nojquiya quintatzintoquilijque: ―¿Nelía, ni amotelpoca? ¿Nelía tacatqui popoyotzi? Huajca, ¿quenicatza hueli tachiya ama?

²⁰Huan inana huan itata quinnanquilijque: ―Tojuanti tiquixmatij ni totelpoca huan tijmatij tacatqui popoyotzi.

²¹Pero amo tijmatij quenicatza hueli tachiya ama, yon amo tijmatij ajquiya quichicajqui iixteyol. Xijtatzintoquilica ya, pampa ya motacachijtoc huan yaya huelis amechilhuis quenicatza elqui.

²²Inana huan itata quiijtojque ya ni pampa quinimacasiyayaj nopa tayacanani ten israelitame cati ya teyolmelajtoyaj sinta se masehuali quiijtosquía para Jesús eltoya nopa Cristo cati Toteco quiijto para quititanisquía, huajca ayecmo quicahuilisquíaj ma calaqui ipan tiopamit.

²³Huajca inana huan itata quiijtojque: ―Xijtatzintoquilica ya, pampa ya motacachijtoc.

²⁴Huajca ica ompa quinotzque nopa tacat cati achtohuiya eltoya popoyotzi huan quiilhuijque: ―Xijhueyichihua Toteco Dios huan techilhui yaya mitzchicajqui, huan amo Jesús, pampa tojuanti tijmatij ni Jesús se tajtacolchijquet.

²⁵Huajca nopa tacat quinnanquili: ―Amo nijmati sinta yaya se tajtacolchijquet o amo. San ya ni cati nijmati. Achtohuiya niitztoya nipopoyotzi huan ama hueli nitachiya.

²⁶Yeca inijuanti sempa quitatzintoquilijque: ―¿Taya mitzchihuili? ¿Quenicatza mitztachiyalti?

²⁷Huan nopa tacat quinilhui: ―Ya nimechilhui huan amo antechcajque. ¿Para ten anquinequij ma nimechilhui sempa? ¿Huelis anquinequij anquitoquilise nojquiya?

²⁸Huan nopa tayacanani quiajhuaque nopa tacat cati achtohuiya eltoya popoyotzi huan quiilhuijque: ―Ta tijtoquilía Jesús, pero tojuanti tijtoquilíaj Moisés.

²⁹Tijmatij Toteco quicamanalhui Moisés, pero nopa Jesús amo tijmatij canque huala.

³⁰Huajca nopa tacat quinilhui: ―¿Taya ya ni? Amo anquimatij canque hualajqui, pero yaya nechtachiyalti.