Juan 8:6-21

⁶Xkibꞌiꞌij waꞌ che ri Jesús xa re kꞌambꞌal upa chaꞌ kakikoj umak. Ekꞌu ri Jesús xchꞌukiꞌik y rukꞌ ruwi uqꞌabꞌ xujeq katzꞌibꞌan chwa rulew.

⁷Yey rike lik kakikꞌot upa chaꞌ kukꞌul uwach ri tzꞌonobꞌal. Ekꞌu ri Jesús xtakꞌiꞌik y xubꞌiꞌij chike: —We kꞌo junoq che alaq kunaꞌo na jinta kꞌana umak, e nabꞌe riꞌ chukꞌaqa rabꞌaj che wiꞌxoq —xchaꞌ.

⁸Tekꞌuchiriꞌ, xchꞌukiꞌ tanchik y rukꞌ ruwi uqꞌabꞌ xtzꞌibꞌan tanchi chwa rulew.

⁹Konoje rike echiriꞌ xkita waꞌ wa xubꞌiꞌij, xkinaꞌ kibꞌ kꞌo kimak. E uwariꞌche, pa jujun xebꞌel bꞌi. Nabꞌe xebꞌel bꞌi ri e nimaq winaq; tekꞌuchiriꞌ, ri e kꞌakꞌal. Echiriꞌ konoje ebꞌelinaq chubꞌi, xew ri Jesús y rixoq xekanaj kan chiriꞌ.

¹⁰Ekꞌuchiriꞌ xtakꞌiꞌ ri Jesús y xrilo na jinta chi junoq chiriꞌ, xew chi rixoq, xubꞌiꞌij kꞌu che: —Ixoq ¿pa e kꞌo wi ri kakikoj amak? ¿Na jinta junoq xuqꞌat tzij re kamik pawiꞌ? —xchaꞌ.

¹¹Rixoq xubꞌiꞌij che: —Na jinta junoq, Wajawal —xchaꞌ. Ekꞌuchiriꞌ, ri Jesús xubꞌiꞌij che: —Jenelaꞌ riꞌin na kanqꞌat ta tzij re kamik pawiꞌ. Jat kꞌu riꞌ y matmakun chik —xchaꞌ.

¹²Ri Jesús xchꞌaꞌt tanchi kukꞌ ri winaq, jewaꞌ xubꞌiꞌij chike: —In ri Qꞌijsaq che ruwachulew. China kꞌu ri katerej lo chwij, na kabꞌin ta chi kꞌenoq pa qꞌequꞌm ma kꞌo ri Qꞌijsaq rukꞌ yey waꞌ e ri kuya kꞌaslemal —xchaꞌ.

¹³Ekꞌuchiriꞌ, ri fariseos xkibꞌiꞌij che ri Jesús: —Na jinta uchak ri kabꞌiꞌij la, ma xa chiꞌibꞌil ibꞌ la kabꞌiꞌij la saꞌ ri wach la —xechaꞌ.

¹⁴Ri Jesús xukꞌul uwach: —Tobꞌ in ri kinqꞌalajisan re saꞌ ri nuwach, ri kambꞌiꞌij lik qatzij; ma wetaꞌam pa in petinaq wi y wetaꞌam pa kinꞌek wi. Noꞌj ralaq na etaꞌam ta alaq pa in petinaq wi y na etaꞌam tane alaq pa kinꞌek wi.

¹⁵»Ralaq, echiriꞌ kabꞌiꞌij alaq saꞌ ri kachꞌobꞌ alaq puwi junoq, kaꞌan alaq waꞌ xa rukꞌ ri naꞌoj re ruwachulew. Noꞌj riꞌin na je ta laꞌ kanꞌano.

¹⁶Echiriꞌ kꞌo kanqꞌalajisaj chirij junoq, qatzij ri kambꞌiꞌij. Ma na xa ta pa we riꞌin ri kambꞌiꞌij; ma ri nunaꞌoj riꞌin lik junam rukꞌ runaꞌoj ri Nuqaw, ri xtaqaw lo weꞌin.

¹⁷»Yey chupa ri Tzij Pixabꞌ e alaq, tzꞌibꞌital kanoq: “We e kꞌo kaꞌibꞌ tikawex junam kakijikibꞌaꞌ uwach ri kakibꞌiꞌij, e kakoj ke riꞌ.”

¹⁸Ri kanqꞌalajisaj riꞌin chiwibꞌil wibꞌ, kajikibꞌax uwach ruma ri Nuqaw, ri taqayom lo weꞌin —xchaꞌ.

¹⁹Xkitzꞌonoj kꞌu che: —¿Pa kꞌu kꞌo wi ri qaw la? —xechaꞌ. Ri Jesús xukꞌul uwach: —Ralaq na etaꞌam ta alaq nuwach riꞌin y na etaꞌam ta alaq uwach ri Nuqaw; ma we ta etaꞌam alaq nuwach riꞌin, jekꞌulaꞌ riꞌ etaꞌam alaq uwach ri Nuqaw —xchaꞌ.

²⁰Ri Jesús xubꞌiꞌij waꞌ echiriꞌ kakꞌutun pa ri Rocho Dios, chiriꞌ pa kꞌo wi ri kaxa re qasaꞌn. Noꞌj na jinta junoq xchapaw bꞌi re, ma kꞌamajaꞌ kopon ruqꞌijol.

²¹Xubꞌiꞌij tanchi ri Jesús chike: —Riꞌin kinꞌek y ralaq kintzukuj kꞌu alaq, pero kakam na kꞌu alaq riꞌ pa ri mak alaq. Ma pa kinꞌek wi riꞌin, na kopon ta ralaq chilaꞌ —xchaꞌ.