Juan 8:40-59

⁴⁰Agwa cha kle gerule ulia ba ulita ole Chube cha tku tangle kare gire ba ulita takalin cha gweda cha kle gerule giti ba ole, Abraham me su age ene ba kle age kare.

⁴¹Ba me kle age Abraham agedu kare, ba ulita kle age salengwli ba ulita ñenuanu kle age kare. Jesu gerudu ene gire kwian israelita ulita gerudu: —Cha ñenua me cha jun ke giti, uñale cha ulitage cha ñenua gdaitre alin, e Chube, ama cha ulita ñenuanu.

⁴²Jesu gerudu: —Ulia Chube ba ulita ñenua ba kle gerule kare, ene ba ulita mo ta dbadale no cha ole cha gai dage, agwa ba ulita me kle mo ta dbe no ene cha ole. Cha chiu ulia Chube ngwadi, cha kle aini ba ulitaske, cha me chiu mo ta giti agali, agwa Chube cha kagu nga dba ai giti.

⁴³¿Mineade ba ulita ole cha kle gerule ba me kle geru e gbe gdadi mo alin? Ba kle mo ta gbe tañachuge ma no ba me cha gerua keruchuge no, ba me kle mo ta gbe no geru ole cha kle gerule kare,

⁴⁴ba kle mo ta gbe tañachuge ma no age ba ñenua kle age kare, ama geru jinanga tanre ngwale, ba ñenua che dolla kada Satanás, ba ulita ama kirolla. Gwange jondege alin Satanás kwian gwangada, kaire ama geru jinganga tanre ngwale, ama me mo ta gbu no Chube gerua ulia ole, malen ama ni gerule sidri ulia, ama tale geru ulia me kle, malen ama me ñage gerule ulia, ama geru jinanga ngwale mauña, ama kwian ulita ta gbe geru jinade ngwale ama kare.

⁴⁵Agwa cha gerunga ulia diali, cha me geru jinade ngwale ni sidri Satanás kare, ba Satanánu malen ba ulita me mo ta gbe cha gerua gai ulia.

⁴⁶Ni ba gdaite ñage cha gbe jiske gerule cha giti cha agenga me no, cha diali kle age no kle gerule ulia, ¿mineade ba me kle mo ta gbe cha gai ulia?

⁴⁷Kwian bai kaire ulia Chubenu, ama ulita no Chube gerua ole, ama diali mo ta gbe Chube gerua keruchugakalin no. Agwa ba ulita me Chubenu, malen ba me kle mo ta gbe ulia Chube gerua keruchuge no jumale, agwa ba kle Chube gerua keruchuge alin allabi, ba me kle mo ta gbe Chube gerua gai ulia mo alin.

⁴⁸Kwian israelita gerudu Jesuge: —Nege suge cha ulitage cha kle gerule trate ulia ba giti, ulia ba kwian me no nga Samariamu, dolla kle ba tale ama kle ba gbe gerule ulita ngwale ama takalin kare.

⁴⁹Jesu gerudu: —Dolla me kle cha tale ni dolla kle cha gbe gerule, cha kle gerule no ulia trate cha Ñenua giti, cha ama gai dage no, agwa ba ulita kle mo ta gbe gerule cha dollale, ba me kle cha gai dage.

⁵⁰Kwian gerule cha dollale kwian me cha gai dage, cha me e tallade kwian kle age giti cha ole, agwa cha Ñenua takalin kwian ulita gerudale no cha giti cha gai dage no, kwian bai kaire me gerule no cha giti me cha gai dage no, cha Ñenua be kwian ene gbe ji chuge agedu cha ole gdale.

⁵¹Cha gerule ulia ulia ba ulita ole, kwian bai kaire cha gerua gbe gdadi cha gerua gai dage no, kwian ene be toi diali chui tangle cha Ñenua ole cha ole, ama mi chege sugekare cháge cha Ñenuage.

⁵²Kwian israelita ulita Jesu keruchugu gerule ene, gire gerudu: —Nege trate uñale chage dolla kle ba tale, dolla kle ba ta gbe gerule, uñale cha ulitage cha enusulian Abraham toidu, kaire kwian Chube gerua ketanga dabage toidu, ulita jo juma gire ama ulita jokeda. Ba kle gerule kwian bai kaire ba gerua gbe gdadi ba gerua gai dage no, kwian ene be toi diali chui tangle.

⁵³¿Ba kle tañachuge ba ma kweri che enusulian unsuialin Abrahamge? Che enusulian Abraham ma kweri agwa ama me chegu toi diali, ama toidu gire ama jokeda, kaire kwian Chube gerua ketanga dabage ulita, ama kaire kweri agwa ulita me chegu toi gwade diali, ama ulita jokeda, ¿ba chema gerudale ba kle gerule kare? ¿Chema be ba kle gerule kare gai ulia? Cha me ba gerua gai ulia ba kle gerule kare, ba me ma kweri cha enusulian unsuialin ulitage, cha me ba gai ulia ni ba gerua gai ulia.

⁵⁴Jesu gerudu kwian israelita ole: —Cha kle age ulita cha me kle age mo ta giti ene kwian gerudale no cha giti cha kweri, me ene, cha mo gbe ene kweri mo ta giti, e ngwale, ngwale cha agali mo ta gbe kweri kwian gwa giti, e me trate. Agwa cha gbanga kweri, ama gerunga no cha giti, ama cha Ñenua Chube. Cha Ñenua e amaña ba ulita kle gerule ba Chubea,

⁵⁵agwa ba ulita kle sole, ba me ama uñe ulia, agwa cha ama uñe trate. Cha gerule gweale ba ole cha me ama uñe, ene cha kle age ba ulita kare ba ulita kwian songa ngwale kare. Agwa cha gerule ulia ba ole, ulia ulia cha ama uñe trate, cha kle age ulita ama kle gerule kare cha ole.

⁵⁶Ba ulita enusulian unsuialin Abraham, Chube ama ta gbu cha chuia giti, uñadu trate Abrahamge cha be chke nga dba ai giti, Abraham cha chuia e manadu nga suga no ole, ama gwagedu cha chuiadi gire nga sugedu no no ama tale cha giti, ama cha uñu cha gwagedu amadi.

⁵⁷Kwian israelita gerudu Jesuge: —Abraham enusulin, e unsuialin unsuialin, gire ba kle gerule ba gwagedu amadi, ba ni chura cincuenta molen, ba me ñage gerule ba gwagedu enusulin Abrahamdi.

⁵⁸Jesu gerudu: —Cha gerule ulia ulia ba ulita ole, cha gwagedu Abrahamdi Abraham gwagedu chadi, Abraham bebi menga chebia kote gire cha klebi enebi ngeru Abrahamge.

⁵⁹Jesu gerudu ene gire kwian israelita ulita skochiu jabale Jesudi, ama ulita ke jun Jesu skiagda ta sko ole Jesu gerudu giti, agwa Jesu jwlituda kwian ngleske tangle, Jesu jongwa kwian Jesu dollale ulita gwage, Jesu jo siere u gerungwa Chube olege.