JUAN 8:4-15

⁴Huan quiilhuijque Jesús: ―Tamachtijquet, tijpantijque ni sihuat quichihuayaya tehueli ica se tacat cati amo ihuehue.

⁵Itanahuatilhua Moisés technahuatíaj ma tiquinmictica ica tet sihuame cati quej ni quichihuaj. Huan ta, ¿quenicatza tiquijtohua?

⁶Quitatzintoquilijque Jesús ni para quimasiltise huan para huelis quitelhuise sinta amo quineltocasquía itanahuatilhua Moisés. Huajca Jesús molocotzsehui huan tajcuilo ipan tali ica se imacpil.

⁷Pero inijuanti noja quitatzintoquiliyayaj quenicatza quiijtos. Huajca Jesús moquetzqui huan quiijto: ―Cualtitoc. Nopa masehuali cati amo quema tajtacolchijtoc, achtohui ma quimajcahuili se tet.

⁸Huan sempa molocotzsehui huan tajcuilo ipan tali.

⁹Huan quema inijuanti cati quitelhuiyayaj nopa sihuat quicajque cati Jesús quiijto, pejque yajtiyahuij sesentzitzi. Achtohui yajqui cati más huehuentzi huan teipa quej nopa yajtiyajque hasta san mocajqui nopa sihuat iixpa Jesús.

¹⁰Huajca Jesús moquetzqui huan quiilhui: ―¿Canque itztoque cati mitztelhuiyayaj? ¿Amo aqui cati quinequi mitztepachos?

¹¹Huan nopa sihuat quiijto: ―Amo, tate, amo aqui itztoc. Huajca Jesús quiijto: ―Yon na amo nimitztelhuis. Xiya huan ayecmo xitajtacolchihua.

¹²Sempa Jesús quincamanalhui nopa masehualme cati quiyahualojtoyaj huan quinilhui: ―Na niitztoc quej nopa taahuili ipan ni taltipacti huan nitetaahuilía ipan iniyolo. Cati nechtoquilise ayecmo quipiyase tzintayohuilot ipan iniyolo, pero quipiyase nopa taahuili cati temaca nemilisti cati yancuic.

¹³Huajca nopa fariseos quiilhuijque: ―Ticamanalti ten ta moselti, huajca amo melahuac mocamanal.

¹⁴Pero Jesús quinnanquili: ―Masque nimechilhuía ten na, melahuac cati niquijtohua pampa nijmati canque nihualajqui huan canque niyas. Pero amojuanti amo anquimatij canque nihualajqui huan canque niyas teipa.

¹⁵Amojuanti antetajtolsencahuaj san quej masehualme. Na amo aqui nijtajtolsencahua amantzi.