Juan 8:34-57

³⁴Minikagi si Jesus, “Eneng-enengi niyo se kagi ko kenyo. Se kedita te otaw eg-inang te salà, yan se allang te salà.

³⁵Eked gayed peg-ogpà se allang diyà te balay te amo din te wedad temanan. Meneng se batà, mepakay aw gayed sikandin meg-ogpà diyà te balay te amay din te wedad temanan.

³⁶Yan aw Batà te Timanem se megpelowà kenyo lekat te salà, ontò kaw mekelowà.

³⁷Netegahan ko te bowad-bowad kaw i Abraham. Meneng ibeg niyo mengimatay kanak, so wedà niyo soli se kebenalan ipegtoladà ko diyà te pedowan niyo.

³⁸Se ipegtoladà ko, yan se kebenalan impetaga-taga te Amay ko kanak. Meneng se eg-inangen niyo, yan se medaet pig-ilingan niyo diyà te kenyo kemonaan.”

³⁹Minikagi dan, “Si Abraham se kemonaan day.” Minikagi si Jesus, “Simpana ontò kaw bowad-bowad i Abraham, meg-iling kaw heman te mèpiya ininang din gebii.

⁴⁰Meneng pengkey migtoladà a kenyo te kebenalan impetaga-taga te Timanem kanak, meneng ibeg niyo mengimatay kanak. Kenà niyan se ininang i Abraham.

⁴¹Yan iling kaw te amay niyo.” Minikagi dan, “Kenà kay batà te lowà. Sebad olò se Amay day, aw yan se Timanem.”

⁴²Minikagi si Jesus, “Simpana Timanem se amay niyo, yan kedekelan a niyo peden te pedowan, so pegdini ko, Timanem se linekatan ko. Dimini a kenà lekat te kanak ibeg, meneng insogò a din dini.

⁴³Wedà niyo kelebeti se inikagi ko, so eked kaw keibeg menenalan te kebenalan itoladà ko.

⁴⁴Si Satanas se ontò amay niyo, aw se ibeg din medaet, yan heman se ibeg niyo inangen. Lekat te ketebò te keneyonan, egpengimatay sikandin. Wedad palos labut din te kebenalan, so wedad kebenalan diyà kandin. Aw megkebolalaw sikandin, yan se ketanem te pedowan din, so bolelawun sikandin, aw sikandin se eglekatan te kedita te kebolalaw.

⁴⁵Meneng ontò benal se kagi ko kenyo, aw yan se doun te eked a niyo pemenali.

⁴⁶Wedad sebad kenyo mekeindan te benal doen salà ininang ko. Olò kebenalan se intoladà ko, meneng wedà kaw pemenal kanak.

⁴⁷Egpenenalan se menge batà te Timanem diyà te kagi te Timanem. Meneng kenà kaw batà te Timanem, aw yan se doun te eked kaw penenalan.”

⁴⁸Pegdineg te menge obanen te Judiyo te inikagi i Jesus, minikagi dan, “Benal besi te kenà ka doma day Judiyo, meneng sakop ka besi te probinsya te Samarya eglindoan day. Migkebook ka so dinetengan ka te bosaw.”

⁴⁹Minikagi si Jesus, “Wedad bosaw diyà kanak. Ipegpelangkaw ko olò se Amay ko, meneng eglindò kaw kanak.

⁵⁰Kenà ibeg ko aw megpelangkaw-langkaw a, meneng doen meibeg te ipelangkaw a te otaw, aw sikandin se megpetaga-taga te benal se kagi ko.

⁵¹Eneng-enengi niyo se kagi ko kenyo. Eked detengi te kemetayun se kedita te otaw tomolò te ipegtoladà ko.”

⁵²Minikagi se menge obanen te Judiyo, “Ontò day den netegahan te doen bosaw diyà kamno. Pengkey si Abraham aw kedita te telekeliwat te kagi te Timanem gebii, dinetengan se kedita dan te kemetayun. Meneng minikagi ka te eked detengi te kemetayun se otaw tomolò te ipegtoladà nikaw.

⁵³Kenà ka melangkaw diyà te kemonaan day si Abraham, so nematay sikandin aw kedita te telekeliwat te kagi te Timanem gebii. Sinu lay peden se pelingo-lingowan nikaw?”

⁵⁴Timaba si Jesus, “Simpana megpelangkaw-langkaw a, wedad ontong ko. Meneng ipegpelangkaw a te Amay ko, aw eg-ikagi kaw te sikandin se Timanem egsimbahen niyo.

⁵⁵Meneng wedà kaw ketaga-taga kandin. Netaga-taga a kandin, aw simpana mikagi a te wedà a ketaga-taga kandin, bolelawun a heman iling kenyo. Meneng seini se kebenalan, te netaga-taga a kandin, aw egtoloen ko se menge punù din.

⁵⁶Se kemonaan niyo si Abraham, ontò sikandin neluba so metoman din kitaen se pegdateng ko. Kinità a din den aw ontò den sikandin neluba.”

⁵⁷Minikagi se menge obanen te Judiyo, “Wedà ka pa apet te keliman se omay. Ontò ka lay kimità ki Abraham?”