JUAN 8:30-59

³⁰Ne re Jesus zenga, ndalyaa mén wlaleedx Ne.

³¹Lex re Jesus lo men-Israel ne che wlaleedx Ne: ―Belne ysalzaandet de xdiiz noo ne rzëët noo lo de, merpee xpén noo gak de,

³²no zaknan de gonezhe nak ne nli no por ne nli guin nak ne yláá de.

³³Wke men re men: ―Noo yra noo xnëz Abraham zëëd noo, rut lo nakdet noo mén ne che wdoo. ¿Penak na de ne yláá noo?

³⁴Lex re Ne lo men: ―Nligue yna noo lo de, ne yrandxee mén ne rlaa dol che wdoo men lo dol.

³⁵Te mén ne che wdoo ngabdet men lad zhiin familye ne wka men, per le zhiin familye guin lo familye guin ngab ne.

³⁶Por neguin belne rselaa XPee Dëdyuzh de, laa de gak men ne nlipee wláá.

³⁷Che nan noo ne xnëz Abraham zëëd de yra de, per rlaan de yket de noo, porke rlaleedxdet de ne rzëët noo.

³⁸Noo ne wneluu Xuz noo lo noo rzëët noo, zenga ke laa de ne rzëët xuz de neguin rlaa de.

³⁹Wke men re men: ―Abraham nak xuz noo. Lex re Jesus lo men: ―Belne nli zhiin Abraham nak de, slaa de ne wlaa Abraham.

⁴⁰Per lel rlaan de yket de noo por ne rzëët noo diznli ne wneluu Dëdyuzh lo noo. ¡Nunk wlaadet Abraham zegwa!

⁴¹Per le laa de ne rlaa ke xuz de rlaa de. Lex re men: ―Noo yra noo yëten noo ste xuz noo; tebegue xuz noo rap noo, laa me nga nak Dëdyuzh.

⁴²Lex re Jesus lo men: ―Belne nli Dëdyuzh nak xuz de, syaan de noo, porke lo Dëdyuzh wruu noo ne zëëd noo; zëëdet noo noze xkwent noo, sinke laa Ne wxaal noo.

⁴³Rdeedet de kwent xdiiz noo porke rlaandet de ykagyedyag de ne rzëët noo.

⁴⁴Bzelo nak xuz de, ne rlaan men ylaa de, neguin nak ne rlaan de ylaa de. Desde ne waa gyëzlyu rlaa Bzelo gyii. Axtegue rlaandet men diznli, porke nunk rniidet men diznli. Chene rkade men, rbonyoo men ne nak men; porke men ne rkade nak men no laa men nak xuz gyelerkade.

⁴⁵Per le noo kom diznli rnii noo, rlaleedxdet de noo.

⁴⁶¿Txu laa de yra de yzëët belne nuu dol wlaa noo? No belne nli rnii noo, ¿penak rlaleedxdet de noo cheguin?

⁴⁷Mén ne nak xpén Dëdyuzh, rkagyedyag men xdiiz Ne. Per le laa de yra de nakdet de xpén Ne, por neguin rkagyedyagdet de xdiiz Ne.

⁴⁸Lex re yra men-Israel lo Jesus: ―Nli ke rnii noo gon ne men-Samaria nak de no ne menzab nuu lextoo de.

⁴⁹Wke Ne re Ne: ―Noo ni te menzab yëtet lextoo noo, sinke le noo rzaknon Xuz noo, per le laa de yra de rzaknondet de noo.

⁵⁰Noo ryedet noo gan pezee saknon mén noo, mase nuu te Men ne rlaan ne saknon mén noo, laa Men nga nak ne rlaa gyelextis.

⁵¹Nligue yna noo ne men ne rlaa ne rzëët noo, nunk guetet men.

⁵²Lex wke men-Israel, re men: ―Orree si che nan noo ne menzab nuu lextoo de. Abraham no le yra profet wet men, le laa de naa, na ne men ne rlaa ne rzëët de, nunk guetet men.

⁵³¿Peguin mazre nondee de ke lo Abraham xpenkwlal noo? Si wet men no wet ke yra profet. Le laa de naa, ¿txuzhleg rzaa lextoo de nak de?

⁵⁴Wke Jesus, re Ne: ―Belne noo ke rlep xeblaan noo, bet nondet ne rnii noo por noo. Per men ne rlep xeblaan noo nak Xuz noo, ne na ke de yra de ne nak XDëdyuzh de.

⁵⁵Per laa de rnebeeydet de me. Noo si rnebeey noo me, no belne yna noo ne rnebeeydet noo me, noze rkade noo zeg rlaa ke de. Per noo nli rnebeey noo me, no rlaa noo ne rzëët me.

⁵⁶Abraham xpenkwlal be, kesentyent rzhiilen men ne kwii men dxe ne chiid noo, no chene wii meno, mazre ntozdee wzhiilen men.

⁵⁷Lex re men-Israel lo Jesus: ―Ni txupchii iz gardet gap de, ¿pezee ne yna de ne wii de Abraham?

⁵⁸Wke Jesus, re Ne: ―Nligue yna noo lo de ne axtegue antes ne tsuu Abraham, che nuu noo.

⁵⁹Orguin wgoob men gye ngugye men Ne; per wootsgue Ne lad men, lex wdesu Ne noze lad men yra men, wruu Ne lenxeydoo Dëdyuzh sya Ne.