Juan 8:16-32

¹⁶Ax pa̱n to̱kimpayo̱ꞌypts a̱tseꞌe, pyaatyp yꞌake̱e̱guipts je̱ꞌe̱ veꞌe, ku̱x ka á̱tsjyapeꞌe to̱kimpayo̱ꞌyp, a̱ts je̱ nTeeꞌ veꞌe juuꞌ a̱tseꞌe xke̱jxp, je̱ꞌe̱ts a̱tseꞌe nma̱a̱tto̱kimpayo̱ꞌyp.

¹⁷Veꞌem xa veꞌe je̱ Moisés je̱ pyavaꞌnu̱n vyaꞌañ je̱ts pa̱n je̱meꞌe nu̱me̱jtsk juuꞌ veꞌe du̱ꞌíxtup, toompts je̱ꞌe̱ veꞌe je̱ nu̱ko̱jtspe̱jtu̱n.

¹⁸Nu̱me̱jtskts je̱ꞌe̱ veꞌeda juuꞌ veꞌe a̱ts je̱ nꞌayook du̱nu̱ko̱jtspe̱jttup; a̱ts tseꞌe toꞌk, je̱ts a̱ts je̱ nTeeꞌ, juuꞌ a̱tseꞌe xke̱jxp, je̱ꞌe̱ tseꞌe jadoꞌk.

¹⁹Vanꞌit tseꞌe yꞌamo̱tutú̱vijidi: ―¿Jómaseꞌe yꞌit je̱ mTeeꞌ? Je̱tseꞌe je̱ Jesús yꞌatso̱o̱jvjidi: ―Kaꞌa xa a̱ts miitseꞌe xꞌíxada, ni kaꞌava tseꞌe a̱ts je̱ nTeeꞌ xꞌíxada. Pa̱n ku̱xꞌíxada xa a̱tseꞌe, mꞌíxaiduvapts miitseꞌe je̱ xyu̱p a̱ts je̱ nTeeꞌ.

²⁰Ku veꞌe veꞌem vyaajñ, je̱p tseꞌe ma̱ja̱ tsaptu̱jkp yakꞌixpu̱k vyeꞌna, je̱p joma veꞌe yꞌijt je̱ ya̱x apa̱jkinda; ax ni pa̱na tseꞌe kyamajtsji ku̱x kaꞌanumeꞌe tyukka̱daꞌakyju̱ vyeꞌna.

²¹Vanꞌit tseꞌe je̱ Jesús du̱nu̱u̱jminuva je̱ jáyuda: ―Na̱jkxup xa a̱tseꞌe, xꞌíxtadapts a̱ts miitseꞌe, je̱p tseꞌe mto̱kin ja̱a̱tp mꞌo̱o̱ꞌktat; kaꞌa tseꞌe mꞌo̱ꞌyixjada je̱tseꞌe mna̱jkxtat joma a̱tseꞌe nnu̱jkx.

²²Vanꞌit tseꞌe je̱ israeejlit jayu vyaandi: ―¿Tis, naajkꞌo̱o̱ꞌkuvaajnjup ya̱ꞌa̱ vineꞌe ku veꞌe vyaꞌañ je̱ts kaꞌa veꞌe xꞌo̱ꞌyixumjada je̱tseꞌe njaꞌmdat joma ya̱ꞌa̱ veꞌe ña̱jkxu̱t?

²³Vanꞌit tseꞌe je̱ Jesús ña̱ꞌmu̱xjidi: ―Yájit xa miitseꞌeda, ax ka̱jxmitts a̱tseꞌe; naxviijnitts miitseꞌeda, ax ka naxviijnitapts a̱tseꞌe.

²⁴Vaants a̱tseꞌe je̱ts je̱peꞌe to̱kin ja̱a̱tp mꞌo̱o̱ꞌktat, ku̱x pa̱n kaꞌa xa a̱ts miitseꞌe xjaanchjávada, a̱ts, juuꞌ veꞌe je̱ jayu je̱ tyo̱kin du̱tuknu̱vaatsp, je̱p tseꞌe to̱kin ja̱a̱tp mꞌo̱o̱ꞌktat.

²⁵Vanꞌit tseꞌe du̱ꞌamo̱tutú̱vidinuva: ―¿Pa̱nts mitseꞌe? Je̱tseꞌe je̱ Jesús yꞌatso̱o̱jvjidi: ―Vanꞌítani a̱tseꞌe nꞌavana ku a̱tseꞌe nyakꞌixpa̱jkꞌukvaajñ.

²⁶Je̱p xa veꞌe may viijn joma ka̱jx a̱ts miitseꞌe nvaajnjadat je̱tseꞌe nto̱kimpayo̱ꞌo̱ydat. Je̱ꞌe̱ pa̱n a̱tseꞌe xke̱jxp, tyú̱vamts je̱ꞌe̱ veꞌe juuꞌ du̱ka̱ts. Ax juuꞌts a̱tseꞌe nka̱jtsp yaja naxviijn, je̱ꞌe̱ts je̱ꞌe̱ veꞌe juuꞌ veꞌe kyo̱jts je̱ts a̱tseꞌe nꞌamo̱tunajxy.

²⁷Kaꞌa tseꞌe je̱ jayu du̱vinmó̱tudi je̱ts je̱ Dios Teeꞌ je̱ꞌe̱ veꞌe tyijp,

²⁸je̱ꞌe̱ ka̱jx tseꞌe je̱ jayu du̱nu̱u̱jmidi: ―Ku xa a̱ts miitseꞌe xyakka̱jxmpojtu̱ktat, a̱ts, je̱ Jayu Juuꞌ veꞌe Nu̱pa̱a̱mdu̱ka Ijtp, vanꞌit tseꞌe xnu̱jávadat je̱ts je̱ꞌe̱ a̱tseꞌe juuꞌam a̱tseꞌe, je̱ts kaꞌa a̱tseꞌe juuꞌ ntun nka̱ts ya̱ nꞌavintso̱ vinmaꞌyu̱n ka̱jx, je̱ꞌe̱jyji a̱tseꞌe nka̱jtsp juuꞌ a̱tseꞌe je̱ nTeeꞌ xtukꞌix,

²⁹je̱ꞌe̱ a̱tseꞌe xke̱jxp. A̱ts ma̱a̱t je̱ꞌe̱ veꞌe yꞌit, ni vinꞌita xa a̱tseꞌe xkamasa̱ꞌa̱k, ku̱x je̱ꞌe̱ a̱tseꞌe ntuump xa̱ꞌma juuꞌ je̱ꞌe̱ veꞌe yꞌo̱yjaꞌvip.

³⁰Ku veꞌe je̱ Jesús veꞌem vyaajñ, nu̱may tseꞌe je̱ jayu jyaanchjaꞌviji.

³¹Vanꞌit tseꞌe je̱ Jesús du̱nu̱u̱jmi je̱ israeejlit jayu juuꞌ veꞌe jaanchjaꞌvijidu: ―Miits xa veꞌe a̱ts je̱ nꞌixpa̱jkpada pa̱n mjaaꞌkpana̱jkxtupeꞌe juuꞌ a̱tseꞌe nka̱jtsp,

³²mnu̱jávadapts miits je̱ꞌe̱ veꞌe je̱ tyu̱v je̱ꞌe̱, je̱ts je̱ tyu̱v je̱ꞌe̱, je̱ꞌe̱ tseꞌe myakꞌítjadap naspa̱ka.