Juan 8:13-22

¹³Pegdineg te menge Parisiyo te inikagi din, minikagi dan, “Olò sebad no se mig-indan kenami tepad te kamno pegkeotawun. Eked kepemenali se inikagi nikaw.”

¹⁴Timaba si Jesus, “Pengkey olò sebad ko se mig-indan tepad kanak, meneng benal se inikagi ko, so netegahan ko aw kenan a lekat, aw netegahan ko heman aw kenan a pesalo. Meneng sikiyo, wedà kaw ketaga-taga aw kenan a lekat aw kenan a pesalo.

¹⁵Aw meg-okom kaw te otaw, lekat olò te kenyo aneng-aneng se peg-okom niyo. Meneng siak, kenà tod ko dini se peg-okom ko te otaw.

¹⁶Meneng aw meg-okom a, keseligan se peg-okom ko, so kenà ko sidebok se meg-okom, meneng meg-okom kay te Amay ko simogò kanak.

¹⁷Doen punù ingkeliwat i Moises egtoloen niyo te keseligan se ikegiyen te dowa otaw aw eg-onawa se kagi dan.

¹⁸Yan egkeseligan a, so siak se eg-indan kenyo tepad kanak, aw Amay ko simogò kanak, sikandin heman se eg-indan te benal tepad kanak.”

¹⁹Migtompuyus se menge Parisiyo kandin aw minikagi dan, “Kenan lay se amay nikaw?” Timaba si Jesus, “Wedà niyo ketegahi aw sinu a. Wedà niyo heman ketegahi aw sinu se Amay ko. Aw netegahan niyo aw sinu a, netegahan niyo heman aw sinu se Amay ko.”

²⁰Yan se inikagi i Jesus te pegtoladà din kidoen te dakel simbahan te Judiyo, doton te tambì niyan iningedanan Solanan te Kwarta Ibowang. Wedad otaw nekedakep kandin, so wedà pa dateng se aldaw pinemallì te Timanem te pegdakep dan kandin.

²¹Todà minikagi si Jesus diyà te menge otaw netipon, “Agpet den se pegkesayo ko. Pengkey mengemahà kaw kanak, meneng matay kaw te eked pegwedadi se salà niyo. Eked kaw pekedoton te dotonan ko.”

²²Yan migpeinsaay se menge obanen te Judiyo, “Megpekematay lay sikandin? So minikagi sikandin te eked kidon pekedoton te dotonan din.”