Juan 8:1-41

¹Per lee Jesús nya naz yek yi Olib.

²Nu stub mbizh, gorna mkaxni yizhyo mbare xaa naz roo yidoo stub welt. Lee re myet mbii gax lo xaa nu lee xaa mzob nu mzelo mseed xaa re xaa.

³Zee lee re maestr, xaa nlu xtizh Dios, nu re fariseo nzhano tub ngwnaa, me nguga kachaal kwaan stub xaabyi, nu mzo xaa me xsaww lo re xaa nzhi baa,

⁴zee nzhé xaa lo Jesús: —Maestr, lee ngwnaa ne nguga kachaal kwaan stub xaabyi.

⁵Lee lo xley be kwaan mzaa Ches lo re xey be, xaa yilo, nzhé nzhaal zaake be tub ngwnaa snee nle axta yilo gut be me. ¿Lee luya, cho kwaan né lu?

⁶Mnabdizh re xaa kwaane, zee kiil xaa Jesús, nu snee yizhal xaa tub kwaan gaazh xaa tich xaa. Per lee Jesús mkichyek nu mzelo mkee kwaan kwen yaa lo yo.

⁷Nu lee re xaa seetaka kanabdizh, zee mzoli Jesús nu nzhé xaa lo re xaa: —Rese gu, xaa zer le nik tub kwaan nawent, kee ke yilotlaka yenn me.

⁸Nu mkichyek xaa nu mzelo xaa mkee xaa lo yo stub welt.

⁹Gorna mbin re xaa kwaane, tubga xaa tubga xaa mzelo nya, nu yilotlaka re xaa gol mroo. Gorna ngulo nya re xaa nebse Jesús rop ngwnaa zee mlake,

¹⁰nguxso xaa nu mnabdizh xaa lo me: —¿Ma re me? ¿Che nik tub me nangunaabt kwent lo lu?

¹¹Lee ngwnaa mkeb lo xaa, nzhé: —Nik tub meya, Me Nabeyy. Jesús nzhé lo me: —Nixa na, nanaabt kwent lo lu; nal zyaa nu naletra lu kwaan nawent.

¹²Stub welt Jesús ngunii lo re myet nu nzhé xaa: —Lee na nak kwenta xni yizhyo; loka xaa kwaan reke tich na, nkano xaa xni kwaan nzaa yalnaban, nu nazet xaa naz lo yalnakaw.

¹³Lee re fariseo nzhé lo xaa: —Leeka kwent cheen lu kazaa lu; nanont kwent ba.

¹⁴Lee Jesús mkeb nzhé: —Non kwent cheen na, nixa leeka na nzaya. Nel ne na pa naz nzhal na nu pa naz nya na; per lee re gu nanet pa naza.

¹⁵Lee re gu naab kwent mod mbezh re myet. Lee na nanaabt kwent lo re xaa;

¹⁶per chelee na naab na kwent, zee naka tub kwaan nali, nel nanaabt techo na kwent, sinka noka Xuz na, xaa mxaal na, naab kwent kwaan na.

¹⁷Lee lo ley cheen be nzhé, chelee chop testig nii tubka kwaan, non kwaan nii xaa.

¹⁸Wena, leeka na nak tub testig kwent cheen na, nu lee Xuz na, xaa mxaal na, nak stub testig.

¹⁹Zee mnabdizh re xaa: —¿Ma xuz lu? Jesús mkeb nzhé: —Lee re gu nanlabeyyt na nixa Xuz na, chol nlabeyy gu na, noka nlabeyy gu Xuz na.

²⁰Jesús nzhé re kwaane leezha kaseed xaa re xaa lo lach roo yidoo, paro nzhib alkansi, pa ngo xaa gon leen. Per nik tub xaa namzent xaa, nel zer zhin gor cheen xaa.

²¹Jesús mbare nzhé lo re xaa: —Lee na nya, nu kwaan re gu na, per yet re gu lo jwalt cheen gu. Lee pa nya na nyent mod ya re gu.

²²Kwaanzee lee re xaa nzhé: —¿Che kale xaa xgab gut xaa xaa, zee né xaa nyent mod ya be pa nya xaa?

²³Jesús nzhé lo re xaa: —Re gu nak xaa yizhyo ne, per nanakt na tub xaa yizhyo ne, lee na nzhal naz yiba.

²⁴Kwaanzee nii na lo gu, yet gu lo re jwalt cheen gu, nel chelee gu nanzakt gu lee na nak Xaa Mxaal Dios Nabeyy, yet gu lo re jwalt cheen gu.

²⁵Zee mnabdizh re xaa lo xaa: —¿Cho nak lu? Jesús mkeb nzhé: —Axta yilo nii na cho nak na.

²⁶Nu nzho zyen doo kwaan nzho mod naab na kwent lo gu; per lee xaa mxaal na nii kwaan wli, nu nebse re kwaan nguné xaa lo na, yé na lo re myet yizhyo.

²⁷Per lee re xaa namzeent kazaa xaa kwent cheen Xuz xaa.

²⁸Kwaanzee nzhé xaa lo re xaa: —Gorna kee re gu na lo krus, Xaa Mzhin Ngok Myet, gorzee ne re gu cho nak na, nu nanlet na kwaan nzhekla na; nebse nii na kwaan mseed Xuz na na.

²⁹Nel lee xaa kwaan mxaal na nzo kwaan na; lee xaa namlat techo na, nel tubka nle na kwaan nyula xaa.

³⁰Gorna nzhé Jesús kwaane lo re xaa, zyen doo xaa mzelo ngwii lo xaa mod Xaa Mxaal Dios Nabeyy.

³¹Lee Jesús nzhé lo re myet, xaa mwii lo xaa: —Chelee re gu zob gu xtizh na, wlipa nak gu tub xaa nseed lo na;

³²labeyy gu re kwaan wli, nu re kwaan wli le zee gak gu mod tub xaa mla.

³³Lee re xaa mkeb nzhé: —Lee re nu nak dii cheen Abraham, nu nik tub welt zer gak nu mos cheen tub xaa; ¿chozhiin né lu lo nu, gak nu mod tub xaa mla?

³⁴Jesús nzhé: —Wlipa na nii na lo re gu, xaa nle jwalt nak mos cheen re kwaan nawent.

³⁵Lee tub mos nambazt tira garli xaa nabeyy lo xaa, per lee xgann xaa tira nzho garli xaa.

³⁶Kwaanzee chelee xgann Dios le zee gak gu mod tub xaa mla, zeesi wlipa nak gu xaa mla.

³⁷Nela na lee gu nak dii cheen Abraham; per nzhekla gu gut gu na, nel nanzheklat gu zob gu xtizh na.

³⁸Na nii kwaan mlu lo na leezha mzo na kwaan Xuz na, nu sbaaka lee re gu nle re kwaan nguné xuz gu lo gu.

³⁹Lee re xaa nzhé: —¡Lee nu nak dii cheen Abraham! Per lee Jesús mkeb lo re xaa nzhé: —Chol nak gu dii cheen Abraham, zle gu kwaan mle xaa.

⁴⁰Per lee re gu nixa nii na lo gu kwaan wli, kwaan mseed Dios na, nzhekla gu gut gu na. ¡Tub kwaan snee nik tub welt namlet Abraham!

⁴¹Lee re gu nle kwaan nle xuz gu. Lee re xaa nzhé: —¡Lee re nu nanakt xinn xto xaa; nkano nu tubka xuz nu, xaa nak Dios!