Juan 7:6-33

⁶Tsenam Jesus nerqan: —Manaran tseman ewanäpaq öraraqtsu. Peru qamcuna ewayänequipaqqa ime örapis allim.

⁷Qamcunataqa nunacuna manam chiquiyäshunquitsu, peru noqataqa chiquiyäman, mana alli ruraq cayanqanta niptïmi.

⁸Tse fiestaman qamcuna ewayë. Noqaqa manaran ewätsu, porqui manam orä chämunraqtsu —nir.

⁹Tseno nirmi, Galileacho quedacorqan.

¹⁰Peru wauqincuna tse fiestaman jeqariyaptinnam, mana pipis reqiyänanpaq, rataquillapa Jesuspis ewarqan.

¹¹Fiestachonam tsecho autoridacuna Jesusta ashiyarqan: —¿Mechoraq tse nuna quecan? —nishpa.

¹²Y tsecho atscaq nunacunanam quiquincuna pura Jesuspaq parlarnin, queno niyarqan: “Pëqa alli nunam” nir. Peru waquincunanam niyarqan: “Manam allitsu. Nunacunatam ulipan” nir.

¹³Tsecho autoridacunata mantsarninmi, nunacuna pacallapa tseno parlayarqan.

¹⁴Selebrecayanqan fiesta pullancho quecaptinnam, templuman Jesus witsarqan nunacunata yachatsinanpaq.

¹⁵Yachatsiconqanta wiyarninnam, tse autoridacuna espantacur queno niyarqan: —¿Imanoparaq quelaya yachecun, mana estudiashqa quecar? —nishpa.

¹⁶Tsenam Jesus nerqan: —Manam quiquï munanqäcunatatsu yachatsicü, sinoqa cachamaqnï parlashqancunatam.

¹⁷Diospa boluntaninta rure munaq caqqa cuentatam qocurenqa yachatsicushqäcuna Diospita shamushqanta y mana quiquïllapita canqanta.

¹⁸Sitsun pipis quiquinpa muneninllata yachatsiconqa, tse nunaqa munanqa quiquinta alabayänantam. Peru cachaqninllata alabayänanta munaq caqqa rasonpa caqta parlaqmi, y manam pëchoqa ni ima uliqui cantsu.

¹⁹Qamcunatam Moises qoyäshorqequi leyta. Y tseno quecaptinpis, manam ni meqequi tse leyta cumpliyanquitsu. ¡Y jananmanpis, wanutsiyämetaran munayanqui! —nir.

²⁰Jesus tseno niptinnam, tse nunacuna queno niyarqan: —¿Pitaq wanutsishiniquita munan? Supëmi qamchoqa yachan —nishpa.

²¹Jesusnam nerqan: —Claru parlaquichoqa, jucta rureconqämi qamcunata mantsacätsiyäshunqui.

²²Masqui yarpäyë: Moisesmi mandayäshorqequi señalacuyänequipaqqa y qamcunanam ollqu wamrata señalayanqui jamaqui junaq quecaptinpis. Tse costumbreqa une awiliquicunapita patsam, manam Moisespitaraqtsu.

²³Si qamcuna, tse mandamientuta cumplita munarnin, jamaqui junaqchopis llullu wamrata señalayanqui, ¿imanirtaq noqapita piñacurcuyanqui, qeshyaq nunata jamaqui junaqcho cachacäratsiptï?

²⁴Ama manaraq alli aberwashpa acusayämëtsu, antis alli cuentata qocuricur imatapis cabeqman jusgayë —nir.

²⁵Tsenam Jerusalencho täraq waquin nunacuna tapunacur, queno ninacuyarqan: —¿Manacu que nunaqa wanutsiyänanpaq ashicayanqan nuna?

²⁶¡Cananqa mana mantsacushpataq llapan nunacunata yachatsin, y manataq ni pi ima nintsu! ¡Rasonpa Dios Acrashqan canqantatsuraq autoridanintsiccuna musyariyashqa!

²⁷Peru noqantsicqa que Jesus me marcapita canqantapis musyantsicmi. Rasonpa Dios Acrashqan captenqa, manam ni pi musyanmantsu mepita canqantapis —nishpa.

²⁸Tseta wiyecurnam, templucho yachatsiquicarnin fuertipa Jesus queno nïcorqan: —¡Tsepenqa qamcuna reqiyämanquichi, y me nuna cashqätapis musyayanquichi! Manam noqaqa quiquïpa munenïpitatsu que patsaman shamorqö, sinoqa rasonpa caqta parlacoq Diosmi noqataqa cachamashqa. Peru petaqa manam qamcuna reqiyanquitsu.

²⁹Noqaqa peta reqïmi, pepita shamushqa car. Y pemi cachamashqa que patsaman shamunäpaq —nir.

³⁰Jesus tseno niptinnam, munayarqan presu tsarita. Peru öran manaraq chaptinmi, mana ni pi almitiyarqantsu tsarita.

³¹Tsenam tsecho atscaq nunacuna Jesusman creyicur, queno niyarqan: —Dios Acrashqan shamorqa, ¡mananachi que nunapita mas milagrucunata ruranmannatsu! —nir.

³²Nunacuna tseno niyashqanta fariseucuna wiyarirninnam, mandacoq caq saserdoticuna y fariseucuna templupa wardiancunata cachayarqan Jesusta presuyänanpaq.

³³Tsenam Jesus queno nerqan: —Ichicllanam qamcunawan carishaq. Tsepitanam cachamaqnïman cuticushaq.