JUAN 7:36-52

³⁶¿Pagox rna neree ne na men: “Skaye de noo, per tsëldet noo lo de, porke gakdet tsa de ledne gya noo”?

³⁷Ne lultim dxe lni nak dxe ne mazre nondee. Dxe guin wzuli Jesus, ndípse re Ne: ―Belne nuu mén rlaan goo nis, chiid men lo noo, noo ydee nis goo men.

³⁸Zegne re lo xgyiich Dëdyuzh, lextoo men ne rlaleedx noo ylen nis ne rguu gyelembán.

³⁹Neree ne re Jesus, rna we ne yra mén ne ylaleedx Ne zaknonen Espíritu Sant men; porke cheguin gardet chiid Espíritu Sant por ne gardet sob Jesus ledne rnebééy Jesus.

⁴⁰Chene won yra menroo menduxtee guin ne re Jesus zenga, gwrol men re: ―Nli ne profet ne gyed chiid nak ménree.

⁴¹Le stebëd men re: ―Laa Crist nee. Per le stebëd zeg men re: ―¿Pezee gak men Crist si men-Galilea nak men?

⁴²¿Pe let redet lo xgyiich Dëdyuzh ne xnëz rrey-David chiid Crist no ne Belén gal Ne, laz ke rrey-David?

⁴³Por neguin noze wren wren ne wnii mén por Jesus.

⁴⁴Gwrol men guin wlaan nsee men Jesus chegyiib, per ni te men wyezhdet nbig nnëëz Ne.

⁴⁵Chene wberee yra men ne rapkwent xeydoo Dëdyuzh ledne ndxin men ne nak farisew yra men fxuz ne rnebééy lo yra fxuz, re men lo men ne rapkwent ydoo: ―¿Penak zëdnodet de men?

⁴⁶Wke men re men: ―¡Rutlel gardet gon noo ynii zegne rnii men!

⁴⁷Lex re men ne nak farisew: ―¿Pe no de che wgoots men xtoo?

⁴⁸¿Peguin nuu men ne nak xextis be u nuuzeg be ne nak be farisew che wlaleedx men?

⁴⁹Yra mén ne nandet pezee zëëd lo ley ne wdee Dëdyuzh lo Moises, cheguel sakzi Dëdyuzh men.

⁵⁰Lex wke te ke men ne nak farisew ne la Nicodemo ne wa wuu diiz yrup Jesus te gyëël, re men:

⁵¹―¿Pe let zëëdet lo ley ne nuudet yzakzi be te mén belne gardet gon be xdiizpee men por ne gaknan be gan pe wlaa men?

⁵²Wke men re men lo Nicodemo: ―¿Pe no de nak men-Galilea? Guseed lo xgyiich Dëdyuzh wen wenendxee gante chen gaknan de ne ni te profet gardet yruu Galilea.