Juan 7:2-25

²Israelita cuanaja chine ebaritu piji dyane jucuare. Riyaque chine juya tupu ecuana erere cuana catitsu tuhua ani bahue jucuare, ecuanaja baba cuana erere cuanaju béru anianinicuareque adebayaque.

³Tuatsehuequi cuanaratu Jesús acuare: —Rehua aniume. Judea yahuaju dirucue; Jerusalénju dirucue chine ishu. Tuhuatu jetiama micue quisarati bacacara juya cuanaque. Tuhua adirucue Yusuja casa tsehue ni ejeque ecuitaja ataquique ama, tunaja dyadi mira aya cuanaque baishu.

⁴Jetiamaja eadeba jucara juyaratu etehua bamere ama aya tuja casa. Jadya ejuuque tunajatu aya eje buchadya dutyara petayaju acara. Mira ecuanaja baishu ejeque ecuitaja ataquique ama aya tibu, acuedya jetiama ecuitaja yacuaju, —jadyatu tuatsehuequi cuanara acuare, tuque ijaribayaque.

⁵Tuatsehuequi cuanaquetu tuaqueja catyatima jari jucuare. Ejeque ecuitaja ataquique ama aishuque camadya bucha tunajatu inime jucuare.

⁶—Huecaca rique ecue juetima jari ecue casa dutya ecuita bamere ishuque. Micuanara camadyatu eau eje tupudya jutidya micuanara ai acara ayaque. Jerusalénju cuacara juatsu, micuana cuayadya.

⁷Yusuja ama cuanaquetu micuana tsehue cahuaitiya ama. Eatsehue bacue ecana dyaque cahuaitiya, era tuna jidama aniyaque cuejajacaya amaju. Jadya tibu tunara ique ujeu baya.

⁸Necuacue micuana Jerusalénju chine jutayaju. Ique cuaya ama jari. Juetima jaritu huecaca tuhua ique casa cabameretiyaque, —jadya tuna Jesúsra acuare.

⁹Tuque jadya au jadya juatsutu tuatsehuequi cuanaque Jerusalénju cuacuare. Jesús bacue ejetsunue cuita ama Galileaju aninucacuare.

¹⁰Eje uma huecaca tuatsehuequi cuanaque chine ishu cuahuaju amatu Jesús cuacuaredya. Batayaju amatu cuacuare, etehua cuau jipenee.

¹¹Israelita cuanaja huaraji cuanaratu Jesús ujeu baatsu sarecuare. Chinera cuahua cuanaque ducu tunajatu bacaduranicuare: —¿Bahua amami Jesús? —jadya tunajatu ecana bacaduranicuare.

¹²Tuhua jucuare cuanaque tuna Jesúsja ishu quisaraticuare. Etehua quisarati jipenee tuna jucuare. —Jesús tu dyaque jidaque, —jadya tuna umae jucuare. —Aijama, jidaque ama tume. Pusha pusha aridaque tume, —jadyatu jucuare peya cuana.

¹³Arepa ecana jetiama Jesúsja ishu quisaratiya ama bucha, ejitaju cuita ama tunajatu quisarati acuare israelita huaraji cuanara ebacauju, tunara Jesúsja ishu jida quisarati ayaju bacatsu enerecaturauju caadebatitsu.

¹⁴Amena chine patya patya dyane, chine terehuietu Jesús nubiticuare Yusuja etareju. Nubitsutu catibuticuare tuhua cuanaque bahuitya.

¹⁵Israelita cuanaja huaraji cuanatu tuque jadya bacatsu anajacatacuare. —¿Eje bucha juatsu jatsu ri riyaque dyaque inime adebabada cuita? Tuque taa tu ecuana cabahuityatihua bucha ama cabahuityatihua. Tujatu ecuita cuana bahuityataqui ama, —jadya tunajatu ecana acuare tuhua anibareya cuanaque.

¹⁶Jesúsra tuna quemitsacuare: —Ecue casa tsehue camadya ama tuque ecuita cuana bahuityaya, Ique Cuadishaquija casa tsehue.

¹⁷Ecue Etata Yusura cuatsashaya eque juya cuanaque tuna bahue ique Yusuja inime eque quisaratiyaque, ai ecue inime ama.

¹⁸Aniyatu umae tunaja inime equedya jutidya ecuita cuana bahuitya juya cuanaque, Yusura casa tyaya tsehue ama. Tume cuanaque tuna jadya juya muita ishu cuita camadya. Peya cuana bacue jadya ama. Yusu Tuna Cuadishaquija casa tsehue tunajatu ecana bahuityaya. Tuja cuanaque tuna jadya juya Yusu muimere ishu, tunadya jutidya camuimereti ishu ama. Tuna tuna yuneri quisaratiya. Tunaratu ni ejeque ijahue aya ama.

¹⁹“Moisesratu huenecuare micuana dutya tuja cacuatsashati eque ani ishu datse. Jadya ama bucha micuana ni ejequedya jutidya tume cuanaque cacuatsashati eque cuita aniya. ¿Eje bucha juatsu jatsu micuanara iyecara aya? —jadya tuna Jesúsra acuare.

²⁰Jetiama Yusuja etareju jucuare cuanaratu bacacuare Jesús jadya quisaratiyaju. —Miquemi equijahuatique jutidya. ¿Aira jatsumi iyecara aya? —jadya tunajatu acuare.

²¹Jesúsra tuna acuare: —Icuene tuque ecue bamere pidya achine casa canajara huecacaju, ujejedaque chachanetsu. Ique jadya juya baatsu micuana eatsehue cahuaitichine, canajara huecacaju mere juhua baatsu.

²²Béru tuna Moisésra deca nana ebacua cuana ecuita huitu biti catibutishacuare cuinana huecaca catsurutihuaju, achaacha eque israelita jadique adebataqui juishu. Riyaque cacuatsashati aijama jarijutu ecuanaja baba cuana ecuita huitu biti catubuti bahuedya jucuare. Arepa canajara huecaca ama bucha, tuque micuana ebacua nana cuana ecuita huitu tubutaqui tumeque huecaca, cuinana huecaca catsurutiyaju.

²³Canajara huecacaju micuana jubahuedya jadya, Moisésra cuatsashahua eque ama ejuu tibu. Micuana tumeque huecaca jadya juya tibu, ¿eje bucha juatsu jatsu micuana eatsehue cahuaitiya era ujejedaque canajara huecacaju chachanechine baatsu? Micuanara ique aya iquepa Moisésja cacuatsashati eque ama juya jadya.

²⁴Masadama ejeque misida neaume pana bau amaque yuneridya tumeque inime metseque baecuaque. ‘Jidamatu juhua’ jadya neaume ejeque baatsudya jutidya. Cajuchatiya bucha datse ni tuque micuana ebau cajuchatiyaque ama. Micuanara ni ejeque jidama juya jadya aya, pana bahue nejucue yuneridya tumeque jidama juhuaque, —jadya tuna Jesúsra acuare.

²⁵Tumetu umae Jerusalénju cuanaque tuna cama quisaratitibunecuare: —¿Jeequedya ama ri ecuanaja huaraji cuanara iyecara ayaque?