Juan 7:19-43

¹⁹’¿Che nawlit Ches mzaa ley lo re xey be? Per nik tub gu nanlet kwaan nzhéya. ¿Chozhiin nzhekla gu gut gu na?

²⁰Lee re myet nzhé: —¡Tub mbi mal nzho lextoo lu, kwaanzee nawent nzhak yek lu! ¿Cho nzhekla gut lu?

²¹Jesús nzhé: —Re gu mdedyall nel mle na tub kwaan gro zhe sab, mbizh kwaan nzholl re be lo Dios.

²²Ches mseed be zee koo be xgann be beyy cheen re xaa sawlazh be (nixa kwaane namzelot lo Ches, lee kwaane mzelo lo re xey be, xaa mas yilo). Nu lee re be ngoo madoo madbyi beyy, nixa ped naka mbizh kwaan nzholl re be lo Dios.

²³Nal chelee gu nzak gu wen koo be beyy tub madoo mbizh kwaan nzholl re be lo Dios, zee le be kwaan nzhé ley cheen Ches, ¿chozhiin nayii gu ne gu na nel msekwen na dub kwerp cheen tub xaa mbizh kwaan nzholl re be lo Dios?

²⁴Nanaabt gu kwent mod nlu re kwaan lo gu. Leezha naab gu kwent, ble guya tub mod nali.

²⁵Zee lak re xaa nzho Jerusalén, mzelo nzhé: —¡Wii gu, xaa ne kakwaan re xaa, zee gut xaa xaa!

²⁶Nu nal baa nzo xaa delant lo re xaa kanii xaa, nu nik tub xaa naniit lo xaa. ¿O che noka re xaa non nzak wlipa lee xaa nak Crist, Xaa Xaal Dios Nabeyy?

²⁷Per re be ne pa nze xaa ba, per gorna yaad Xaa Xaal Dios Nabeyy, nik tub xaa nanet pa naz yaad xaa.

²⁸Nu zee mseed Jesús re xaa lo lach roo yidoo, nu nzhé xaa dublegan: —¡Re gu nzak nlabeyy gu na nu ne gu pa naz nzhal na! Per nanzhalt na nel nzhekla na, nzhal na nel lee xaa nali mxaal na, xaa kwaan nanlabeyyt re gu.

²⁹Na nlabeyy xaa ne nel lo xaa mroo na, nu lee xaa mxaal na.

³⁰Zee nzhekla re xaa zen xaa, per nik tub xaa namgalt xaa nel zer zhin gor cheen xaa.

³¹Zyen doo xaa mwii lo xaa nu nzhé xaa: —Lee xaa ne nak Xaa Mxaal Dios Nabeyy nel nle xaa rese kwaan gro, nel rese kwaan nzho mod le xaa.

³²Lee re xaa fariseo mkenzha kwaan mbezh re myet cheen Jesús; nu lee xaa nu re ngwleyy non, mxaal lak polisi, xaa nkanap yidoo, zee zen xaa xaa.

³³Zee lee Jesús nzhé: —Xepse kwaz na lo gu, zee bare na lo xaa mxaal na.

³⁴Zee re gu kwaan na, per nayizhalt na lo gu nel nyent mod ya gu pa nya na.

³⁵Zee lee re myet mzelo mnabdizh lo re wechxinn: —¿Pa nya xaa ne, zee nayizhalt xaa ne lo be? ¿Che nya xaa naz lo re sawlazh be, xaa nzho stub naz re yezh nu noka seed xaa re xaa nanakt xaa sawlazh be?

³⁶¿Cho kwaan nzhekla xaa ne né xaa, gorna ngunii xaa: “Kwaan gu na per nayizhalt na lo gu, nel nyent mod ya gu pa nya na”?

³⁷Mbizh gwluzhtlaka lo yalni, mbizh kwaan mas non, Jesús nguxso nu nzhé lo re xaa dublegan: —Chelee tub gu nzhek lextoo, te gu lo na nu go gu nis.

³⁸Gaka modxa nzhé Xkyech Dios: “Loka xaa kwaan wii lo na, lextoo xaa roo nis kwaan zaa yalnaban kwaan tira”. Ez. 47:1; Zac. 14:8

³⁹Kwaan kwaane nzhekla Jesús yé: Loka xaa wii lo xaa, kayaa xaa Mbi Naban; nel lee Mbi Naban zeeraka yaad zee, nel lee Jesús zeeraka bare nya naz yiba.

⁴⁰Nzho lak re xaa mbin kwaane, nzhé xaa: —Wlipa lee xaa ne nak xaa nzaa kwent kwaan nzhé Dios lo lee xaa, xaa nakladiizh yaad.

⁴¹Zlak xaa mbezh: —Xaa ne nak Xaa Mxaal Dios Nabeyy. Per zlak xaa mbezh: —Naleet xaaya, nel Xaa Xaal Dios Nabeyy nyent mod ngal yizhyo Galilea,

⁴²nel lee Xkyech Dios nzhé, lee Xaa Xaal Dios Nabeyy nzhaal gak xaa dii cheen rey David, nu gal xaa naz yezh Belén, leeka yezh pa ngol David.

⁴³Snee ngok rol myet kwent cheen Jesús.