Juan 7:16-31

¹⁶Jatian jaskáakin shinankanai onanxon, jato Jesussen neskaa iki: —Ja mato en onanmai joibora nokon shinanbima iki. Diossenra ea raana iki mato jaskáakin onanmanon ixon.

¹⁷Jaweratoboki Diossen keena keskáres ati shinanya iki, jabaonra onanti atipanke; ja en mato onanmaiboki Diossen joi iki, iamax nokon shinanmanbiki en jato yoiai iki ixon.

¹⁸Ja jawen shinanmanbi yoyo ikai joni riki, jaskáaxon jashaman rabikanon ixon benai ikaires. Ikaxbi, eabiribi ponteti yoyo ikai, jan ea raana nokon Papabiribi rabikanon ikax, jaskara ikaxiki, jakopi ea jakonmaakin yoikanti yama.

¹⁹Moiséssenra ja senenhati esé mato menia iki. ¿Jaskaramarin? Jaskara ikenbira, westíoraxonbi maton ja esé senenhayamai. Jakopira ea retenoxon maton shinannai —akin jato aká iki.

²⁰Jaskáketianra, jonibaon neskaa iki: —Yoshin naikia ikaxa, mia jaskatai ¿Tsonki mia retekasai? —akin.

²¹Jatian Jesussen jato yoia iki: —Westíoraakin en tantiti netenbi isinai joni benxoaketianra, mato kikinbiresi ratékana iki.

²²Ikaxbi matora Moiséssen yoia iki, ja maton jakina rebichi xateti axé jenetima, (jara iká iki ja reken papashokobaon jato yoia ikax, Moiséssen yoiama), jatianra ja senenhakin maton akai, wetsatianbo tantiti nete ikenbi jonin jakina rebichi xatexonkin.

²³Jaskara iken, ja Moiséssen esé senenhayamaa inaketian, tantiti nete ikenbi ja benbo baken jakina rebichi jato xatexonai ikaxbiki, ¿Jawekopi mato eki sinatai, ja tantiti nete ikenbi en isinai joni benxoa iketian?

²⁴Jaskara kopí, timenbires akanai jawékibo ointaananres, jato jakonmaakin yoiamakanwe. Jato jaskáakinra maton kikinhakin onanshamanxon ati jake —akin jato Jesussen aká iki.

²⁵Jatian jatíribi ja Jerusalénhain jakanabo ikana iki: —¿Natomarin ja retekaskin benakanai joni?

²⁶Jato bebonxon joi yoiainbi akanai, tsonbi jawe yoiyamakin. ¿Moara non joni koshibaonbira kikinhakin onanke, ja riki ja *Cristo joti yoikatikanai iki ixon?

²⁷Ikaxbi ja *Cristo joketianra, tsonbi jainoax joá onanyamanoxiki. Ikaxbi nato non ayorakin onanke jaweranoarin iki ixon —ikibo ikana iki.

²⁸Jaskákanaitian, Dios rabiti xobo meranxon jato esei iikinbi, koshínshaman jato Jesussen neskáakin yoia iki: —¡Jaskara ixon maton ea onanke, jaweranoaxki ea joá iki ixon! Ikaxbi eara nokon shinanmanbi joáma iki, jan ea raana riki jawetianbi paranmisma, jara maton onanyamake.

²⁹Enresa onanke, jan raana jaibakeax joá, ixon —akin jato aká iki.

³⁰Jaskáketianra, joni koshibaon yatanti shinanna iki, ikaxbi tsonbi ayamaa iki. Jaskáakanti nete senennamapari iketian.

³¹Jaskakanainbira, ichaxon já ikonhaax neskatibo yoyo ikana iki: —Jan noa kishpinmati *Cristo joxonmein ¿Nato jonin aká bebonbires ratéti jawéki anóxiki? —ikibo.