Juan 7:1-15

¹Afe méifodo, Jesús Galilea énɨedo macade. Judéamo íacañede, dɨnomo judíuaɨ ie íaɨoɨ fáiacana jira.

²Ja bɨzáinillaɨmo ɨráɨzillafue áɨnozide. Afefue judíuaɨ rafue.

³Aɨnozillamona ie ámatɨaɨ íena daɨde: —Benó fɨébiñeno. Judéamo o jairi, dɨnomo ite odo jáidɨno o fɨnócafuena cɨ́oillena.

⁴Dáamɨe nana comɨnɨ íena íaɨoɨ onóillena jitáiadɨ, ie raana báinino fɨnóñede. Afe áillofuiaɨ o fɨnóadɨ nana comɨnɨ uícomo fɨnori, —daɨdíaɨoɨ.

⁵Bie izói daɨdíaɨoɨ, mei naɨ ie ámatɨaɨ íena ɨ́ɨnoñediaɨoɨza.

⁶Jira Jesús daɨde: —Cue ñue illɨ́ruimo naɨ dúcɨñede. Mei íadɨ ómoɨmona nano nɨ́garui ñuera.

⁷Enɨe imacɨ ómoɨna éoinide, mei íadɨ cuena éoidiaɨoɨ, nɨbaɨ íaɨoɨ fɨeni fɨnócafuiaɨ uai nabáiraɨmadɨcueza.

⁸Mai ráfuemo omoɨ jai. Naɨ jáiñeitɨcue, cue ñue illɨ́ruimo naɨ dúcɨñede.

⁹Daɨí daɨna mei Galiléamo fɨébide.

¹⁰Ie ámatɨaɨ jailla mei, Jesús daje izói ráfuemo jaide, mei íadɨ uáfodo jáiñede. Jabo báinino jaide.

¹¹Judíuaɨ afe rafue ana íena jenódiaɨoɨ. Daɨdíaɨoɨ: —¿Nɨnomo mei afe ɨima ite? —daɨdíaɨoɨ.

¹²Comɨnɨ cɨ́gɨedo aillo afémɨeri úritiaɨoɨ. Dáarie, “Ñúemɨe,” daɨdíaɨoɨ. Jɨáɨmacɨ, “Fɨénidɨmɨe; mei comɨ́nɨna jɨ́fueteza,” daɨdíaɨoɨ.

¹³Mei íadɨ judíuaɨna jacɨ́ruillano buna afémɨeri uáfodo úriñede.

¹⁴Ja rafue cɨgɨ iruido Jesús Juzíñamui gaɨríracomo jofo jaide. Jaillano dɨnomo llófuellena taɨnede.

¹⁵Iemona judíuaɨ fáɨgacaillano daɨdíaɨoɨ: —¿Nɨe izói bie ɨima dɨga ráfuiaɨna onode, afémɨe naɨ llófueñegamo? —daɨdíaɨoɨ.