JUAN 7:1-13

¹Wluzh wak yra neguin, wa Jesus wkaa Ne lo lyu ne la Galilea; wlaandet Ne nya Ne nkaa Ne lo lyu ne la Judea porke kaye men-Judea gan pezee yket men Ne.

²Per kom che wyob lni ne rlaa men-Israel ne ruu men lenguezh,

³lex re yra bech Ne lo Ne: ―Guruu nee, gutsa Judea chen no ke yra xpén de ne nuu Judea kwii yra gyelmilaguer ne rlaa de.

⁴Porke belne rlaan me ne gaknan mén ne rlaa me, ylaadet mo ngueedx. Laague ne rlaa de gyelmilaguer, gulaa we nes lo yrandxee mén.

⁵Re yra bech Jesus zenga, porke ni laa men rlaleedxdet men Ne.

⁶Orguin re Ne lo men: ―Gardet ydxiin xor noo, per por laa de yra de kwaskyertee or wen rzak de.

⁷Laa de yra de yët gan pe kwentzhe kwinyaan mengyëzlyu de, per noo por ne rzëët noo lo men ne ngyidet ne rlaa men, por neguin rwinyaan men noo.

⁸Gutsa lni yra de; noo tsadetgue noo, porke gardet ydxiin xor noo.

⁹Wluzh re Jesus zenga, wyan ke Ne lo lyu ne la Galilea.

¹⁰Per chene che zase yra bech Jesus, no ke Ne za lni guin, mase rut waknandeto, sinke legue ngueedx za Ne.

¹¹Zad wkaye yra men-Israel Ne lo lni guin, re men: ―¿Gozh mén guin, bes?

¹²Ndal mén ne wa lni guin noze wren wren ne rnii men por laa Ne. Gwrol men re: “Menwen men.” Gwrol zeg men re: “Nakdet men menwen, noze rkade men mén.”

¹³Per ngueedxendxee ruu men xdiiz Ne por ne rdxe men men ne rnebééy lo men-Israel.