Juan 6:9-30

⁹—Kirogwa gdaite kle aini, ama cebada panlla gdatiga molen ngwe gdaboke agwa bligda e me ña kwian ulita alin gutadale.

¹⁰Jesu gerudu kwian geru jwannga amage ulita ole: —Gerule kwian ulita ole toi dba ulita. Nga Jesu kle ngwadi ngauda tanre kledu, kwian ulita toidu dba ngauda giti, kwian e ulitaske kwian onbre ngle cinco mil kledu, kaire muinga ngle kirogwa ngle kledu ule kwian onbre ngle eske agwa muinga, kirogwa me jo teanba.

¹¹Kwian ngle ulita toidu dba ngauda giti gire Jesu pan gdatiga ngwe gdaboke gau kote, Jesu gerudu Chube ole bligda giti: “Cha Ñenua, noare ba bligda ai ketu kwian ai ulita alin gutadale.” Jesu gerudu ene Chube ole gire Jesu bligda girabatangu kwian ulita toiba dba ole, Jesu bligda ulita ketangu kwian ngle ulitage unchkegda kwian takalin kare, Jesu bligda gbu jriennga kwian ngle ulita alin gutadale.

¹²Kwian ulita blidu kwian ulita unchku no bligdadi gire bligda bita ngle cheguda, kwian me ñadu bligda gute ulita. Gire Jesu gerudu kwian geru jwannga amage ulita ole bligda cheguda giti: —Ba bligda bita cheguda lite ole, ba oge, ba me bligda e kagenga ngwale.

¹³Jesu gerudu ene gire kwian geru jwannga Jesuge bligda bita ulita litu ole ski kweri gbataboko giti gbaboke, ski e ulita chku ete bligda cheguda ole.

¹⁴Jesu lle daga ngwale no ene dodadu kwian ngle e gwa giti, gire kwian e ulita gerudu modi Jesu giti: —Ulia ama kwian Chube gerua ketanga dabage be chie cheske aini, Chube gerudu ama giti unsuialin, ama e.

¹⁵Jesuge kwian ulita talla chku uñale, kwian ulita tañachugu Jesu gbe mo chugagwallale, malen kwian ulita tadu kira batakalin Jesuge una ngnagu, gire Jesu jo siere kwian ulitage, Jesu joni nabitaite jwichuga giti.

¹⁶Nga jeredu gire kwian geru jwannga Jesuge ulita joni chibita ngnagu, jo chke chi kagda giti dudi.

¹⁷Gire Jesu nate nga chegu ta, me chieni uñale kwian geru jwannga amage nate, nga jeredu ulita, nga train giti geru jwannga Jesuge ulita jo duge chiga giti chage una Capernaum ngnagu.

¹⁸Geru jwannga Jesuge ulita kledu chage duge chiga giti gire mle kweri chku dudi chiga giti, chi jo chite juga juga mle kwerige.

¹⁹Gire kwian geru jwannga Jesuge ulita kledu duge me chegu ta chuge chi bage duge chiga giti mleske, ama jo bate chiga giti duge, kle chage chi bage duge mleske gire ama ulita kle chage duge gwagedu kwian gdaitedi chage seradi chiga giti du ngnagu, ama ulita kendunga tanre, ama me nu gwagebale bitaite kwiandige chage seradi chiga giti.

²⁰Jesu gerudu: —Ba me kennga chadi, cha amaña kle chage.

²¹Jesu gerudu ene gire sugedu geru jwannga ulitage Jesu amaña kle chage, ama ulita Jesu gau ngwange no duge nga suga no ole, gire sugeti ngwale du jo chke chi kagda giti ama tadu jogekalin ngwadi ama jo chke, ama jo chke Jesu ole.

²²Kwian geru jwannga Jesuge ulita jo ene una Capernaumge, kwian ngle ulita Jesu nu ullaba chegu kwian geru jwannga tane giti nga amañage Jesu ama ulita ullu ngwadi, ama tadu gwagekalin dare Jesudi. Kwian geru jwannga Jesuge ulita bebi joge siere nga ege gire kwian ngle e ulita gwagedu du gdaitre alin kledu chi kagdage, kwian ulita gwagedu kwian geru jwannga Jesuge alin joge du ege, kwian me gwagedu Jesudi joge ule kwian geru jwannga ole, malen kwian ngle ulita tañachugu Jesu cheguda ngmadi. Nagbietege Jesu bebi skwen nate kwian nglege, malen ama ulita chegu tañachuge tanre Jesu giti ama kle baini.

²³Kwian kledu Jesu jinade nate gire gwagedu du na tanredi chie una Tiberiage, du e ulita chku kodi Jesu kwian ngle ullu ngeru ngwadi.

²⁴Uñadu kwian nglege kwian geru jwannga Jesuge ulita jo, kaire Jesu me skwendu ama ulitage ama ulita kle ngwadi, malen ama ulita jo du tanre una Tiberiamuge, jo una Capernaumge Jesu jinade nate.

²⁵Ama ulita jo tangle chkagu chibitage, jo chke chkagu gire Jesu skwendu amage, ama geru kadu Jesuge: —Kwian tkanga tangle geruge, ¿ba chiu ngaminegire aini? Cha me gwagedu badi joge ule kwian geru jwannga bage ole.

²⁶Jesu gerudu kwian ngle ulita ole: —Cha gerule ulia ba ulita ole, ba ulita ta chagekalin cha nate ba takalin cha bligda na kete bage gutadale, cha bligda ketu bage ngeru, ba blidu, ba unchku. Ba kle tañachuge bligda giti alin allabi, agwa ba me kle tañachuge cha lle daga ngwale no dodadu Chube kirallaske giti ba ulita alin, ba me kle tañachuge trate cha giti, me suge bage cha chema.

²⁷Ba me tañachugadale lle boi bligda alin giti bligda gai mau alin gutadale ene ba blire ba me chage bli ole, bligda e bidege me chege diali. Agwa ma no ba ulita tañachuge bligda me bidege giti kaire, bligda e chege chui tangle diali ba tale, cha bligda e kete bage, ene ba be toi chui tangle diali cha Ñenua Chube ole, ama cha kagu nga dba ai giti kwian kare, ama mo kiralla ketu chage age no ba ulita alin.

²⁸Kwian geru kadu Jesuge: —¿Cha ulita agedale mine ene suge chage cha kle lle boi Chube takalin kare?

²⁹Jesu gerudu kwian ulita ole: —Chube takalin ba ulita mo ta gbe ene: Chube nu cha kagaba, ba ulita cha gadale ulia mo tale, ene ba kle age Chube takalin kare.

³⁰Kwian gerudu Jesu ole: —Ba kle gerule mau giti Chube ba kagu, ulia Chube ba kagu cha takalin ba lle gweale daga ngwale no dodade Chube kiralla giti cha ulita gwa giti, ene cha ulita be gwage badi age ene, gire cha be ba gai ulia.