Juan 6:6-31

⁶Snee mnabdizh xaa, zee ne xomod keb Lip, nel nela Jesús cho kwaan le xaa.

⁷Lip mkeb lo xaa nzhé: —Nixa demi kwaan le xaa gan chop gayoo mbizh nagalta zuuy pan kwaan gaw re xaa tikgaya.

⁸Zee lee Ndres stub xaa mseed lo Jesús, wech Simón Pér, nzhé:

⁹—Nee nzo tub xaawin, nkano gaay pan sebad nu chop mbal; ¿per pa gaa kwaane gaw rese xaa?

¹⁰Jesús mkeb nzhé: —Guzh gu lo re xaa zee zob xaa. Nu mzeb doo yixyi baa, zee mzob re xaabyi, kan tub gaay mil xaa.

¹¹Jesús mzen gaay pan, nu gorna ngulo mzaa xaa dixkix lo Dios zee mzaa xaaya lo re nu, zee mdiiz nuya lo re xaa nzob baa; sbaaka kwaane mle xaa kwaan mbal, nu mzaa xaaya ndaw re xaa, axta paro nguzhe lextoo re xaa.

¹²Gorna ngulo ndaw re xaa, Jesús nzhé lo nu: —Btop gu re kwaan mlake, zee naluxta sbaasa.

¹³Zee mtop nuya nu mchezhe nu chiibchop chekwid kwaan pan byog kwaan mlake lo re gaay pan sebad.

¹⁴Zee lee re myet, gorna ngune xaa kwaan gro kwaan mle Jesús, mbezh re xaa: —Wlipa lee xaa ne nak xaa nzaa kwent kwaan nzhé Dios lo lee xaa, xaa nakladiizh xaal Dios yiid lo yizhyo ne.

¹⁵Per Jesús mzeen nzhekla re xaa wee xaa xaa lajwers, zee gak xaa rey cheen re xaa, kwaanzee nya xaa naz yek yi stuba, zee zo techo xaa.

¹⁶Gorna nzela yalchool, lee nu mkato roo nistoo,

¹⁷nguxoob nu leen tub kano nu mzelo nu mzeno nu kano leen nistoo zee zhin nu yezh Capernaum. Nu tira ngulola mla yalchool, lee Jesús zeeraka bare.

¹⁸Zee lee nis mzelo mgun nel nze doo mbi.

¹⁹Leezha nzhazela nu kan gaay o xop kilómetro, ngune nu lee Jesús nzezhin gaxla lo nu nyaad zenii lo nistoo, nu mzheb doo nu.

²⁰Lee Jesús né: —¡Naya, nazhebt gu!

²¹Zee mkayaa nu xaa, nu leeka gor kwaan mzeeb Jesús leen kano, mzhin re nu yezh pa nzha nu.

²²Lee stub mbizh, lee re myet xaa mlake stub ta roo nistoo, ngune lee nu nya leen tub kano kwaan nzo baa nu lee Jesús namyat kwaan re nu.

²³Zee lee stub naz kano nze naz yezh Tiberias mzhin gax pa ndaw rese xaa gorna ngulo mzaa Jesús dixkix lo Dios.

²⁴Nu gorna ngune re xaa nixa Jesús nu nixa re nu nyent baa, noka re xaa mzeeb leen kano nu nzhakwaan xaa Jesús naz yezh Capernaum.

²⁵Gorna mzhin re xaa stub ta roo nistoo, nguzhal Jesús lo xaa nu mnabdizh xaa lo xaa: —Maestr, ¿cho gor nyaad lu nazre?

²⁶Jesús mkeb lo xaa nzhé: —Wlipa na nii na lo gu, gu nkwaan na nel ndaw gu axta paro nguzhe lextoo gu nu nanakta nel mla re kwaan gro kwaan mle na yek gu.

²⁷Nanzhaalt kwaan gu kwaan gaw gu kwaan nandiit tira, sinka kwaan gu kwaan gaw gu kwaan tira ndii nu kwaan nzaa yalnaban kwaan tira lo gu. Nel na nak Xaa Mzhin Ngok Myet zee za na yalnaban kwaan tira lo gu, nel Dios, xaa nak Xuz na, mzob sey cheen xaa cho na, zee ne re myet lee na nak Xgann xaa.

²⁸Zee mnabdizh re xaa nzhé xaa: —¿Cho kwaan nzhaal le nu zee le nu kwaan nzhekla Dios?

²⁹Jesús mkeb nzhé: —Kwaan nzhekla Dios nak, gon gu xtizh na, xaa kwaan mxaal xaa.

³⁰Zee mnabdizh re xaa: —¿Xana tub kwaan nzho mod luu lu lo nu, zee nzho mod le nu krer lu? ¿Cho kwaan nzho mod le lu?

³¹Re xey be, xaa yilo ndaw pan kwaan nyaad naz yiba naz wen, modxa nzhé Xkyech Dios: “Mzaa xaa pan kwaan nyaad naz yiba ndaw re xaa”. Sal. 78:24