Juan 6:6-21

⁶Sayno nergan: “Mä imanimänäshi Felipe” nishpanmi. Jesús musyargannami imanöpa micuyta yurisinanpä cashgantapis.

⁷Saymi Felipe nergan: “Puwag (8) quilantin arupacuycur gänapacushgansiwan rantimushgapis manami aypanmansu caysica runacuna walca walcala micuyänanpäpis.”

⁸Saymi Simón Pedrupa wauguin Andrés nergan:

⁹“Caycho juc wamra sararaycan pisga cebäda tantatawan ishcay pescädulatami, taytay.”

¹⁰Niptinmi Jesús discïpuluncunata nergan: “Lapan runacunata niyay jamacuyänanpä.” Saymi jamacuyänanpä discïpuluncuna niyaptin pashpaman lapan runacuna jamacuyargan. Saychömi olgu cagcunalata yupaptin cayargan pisga warangano (5,000).

¹¹Nircurnami say pisga tantatawan ishcay pescäducunata Jesús aptarcur Tayta Diosta manacur agradëcicorgan. Agradëcicurcurnami discïpuluncunata macyargan runacunata aypuyänanpä.

¹²Lapan runacuna pacha junta micurcuptinnami discïpuluncunata Jesús nergan: “Pusupacuyashgancunata lapanta shuntayämuy.”

¹³Sayno niptinmi pusushgan tantata discïpuluncuna shuntayargan chunca ishcay (12) canasta juntata.

¹⁴Say milagro rurashganta ricaycurmi runacuna cushicur niyargan: “Cay runaga Tayta Dios cachamunanpä cag profëta imacher caycan.”

¹⁵Sayno niyashpanmi runacuna imaycanöpapis nacionninpa mandagnin rey cananpä churayta munayargan. Sayno churayänanta mana munarmi jircapa Jesús japalan aywacorgan.

¹⁶Pasa sacaycaptinnami Jesuspa discïpuluncuna cutiyargan gocha cuchunman.

¹⁷Jesusmi isanga jircapita cutimorganräsu. Saymi büquiman wisarcur discïpuluncunala Capernaum marcaman aywaycäyargan.

¹⁸Aywaycäyaptinmi fiyupa vientuptin yacu pulchagyar galaycorgan.

¹⁹Saypita juc lëwatano aywaycarna Jesusta ricayargan yacu jananpa paycuna cagmanpa aywaycagta. Payta ricaycurmi fiyupa mansacäyargan.

²⁰Saymi Jesús nergan: “¡Ama mansayämaysu! ¡Nogami caycä!”

²¹Sayno niptinmi büquita ichisiyargan Jesús wisänanpä. Saypita maylantanami gocha cuchunman chäyargan.