JUAN 6:56-69

⁵⁶Pønɨ pøn øts nneꞌkx xjøøꞌkxɨp nnɨꞌjpy xꞌuukɨp, xemɨkøjxp øts nmøøtt nꞌett.

⁵⁷Ja Dios Teety pøn ø xkajxp, jaꞌ tmøøtꞌa̱jtp ja jujkyꞌa̱jtɨn, jaꞌagøjxp øts njujkyꞌaty; jøts nayɨdeꞌen pøn øts nneꞌkx nnɨꞌjpy xjøøꞌkxɨp, nay øts køjxpxɨ yꞌettɨ.

⁵⁸Jaꞌabɨ tsa̱pkaaky øts ɨdøꞌøn nnɨgajpxpy midi kɨda̱kp jap tsa̱jpjøtpy. Kaꞌap yø ñayɨdeꞌenɨ sa̱m ja tsa̱pkaaky midi meets ja mꞌa̱ptøjk ojts tkaydɨ, jødsyɨm ja ojts nɨdukɨꞌɨyɨ yjadyimyꞌooktɨ; pønts tkaapy yøꞌøbɨ tsa̱pkaaky midi ø ndijpy, pya̱a̱tpts ja jujkyꞌa̱jtɨn jaꞌ xemɨkøjxp.

⁵⁹Jam ɨdøꞌøn ja nwɨndsønꞌa̱jtɨm Jesús yø yjadeꞌembɨ ɨxpøjkɨn tya̱jky ma̱ ja ja̱a̱ꞌy ñamyukyɨdɨ tsa̱ptøjkjotp, jam Capernaumɨt ka̱jpkøjxp.

⁶⁰Kuts ja pyabøjkpɨtøjk jadeꞌen tmadowdɨ ja ɨxpøjkɨn pøn jam wyɨnaty tpawɨdejttɨp ja nwɨndsønꞌa̱jtɨm Jesús, jøts ja wya̱ndøø: ―Ku yø jadeꞌen wya̱ꞌa̱ñ, janch tsep yøꞌ jøts yø yikupøkt; ¿pøn yø jadeꞌen tijy ukmøjpɨkta̱ꞌa̱kɨp?

⁶¹Xjats ja nwɨndsønꞌa̱jtɨm Jesús tja̱ꞌwɨyɨɨꞌñ, jøts ku ja jadeꞌen tjanchꞌayojɨ ku ja wyɨnaty jadeꞌen tø wya̱ꞌa̱ñ, wɨnets ja tyiktɨɨy: ―¿Yøꞌ mꞌayoojɨdɨp?

⁶²¿Sa̱ mdejtɨt wɨnets jøts ku ø nbatøjkɨnɨt nay jap ma̱ øts jap ijty ndsøønɨ?

⁶³Ja anmɨja̱ꞌwɨn jaꞌ ɨdøꞌøn jujkyꞌa̱jtp; ¿ti yø neꞌkx?, kaꞌap yø ti wya̱ꞌa̱ñ. Jøts ti jaty ø tø ngajpxy, yøꞌ ɨdøꞌøn ja Dios tyɨyꞌa̱jtɨnꞌajtpy, jøts yøꞌ ɨdøꞌøn yikjujkyꞌa̱jtp xemɨkøjxp.

⁶⁴Jøts ja meets ɨxa wɨna̱a̱gɨn pøn yø tkajanchja̱ꞌwɨp. Tø døꞌøn ja nwɨndsønꞌa̱jtɨm Jesús ja wyɨnaty tnɨja̱ꞌwɨñɨ pøn jaty jaꞌadɨ pøn tkajanchja̱ꞌwɨdɨp, jøts jaꞌ pøn ja køya̱kɨyɨp.

⁶⁵Jøts ja yɨdeꞌen yja̱a̱kwa̱a̱ñ: ―Jaꞌagøjxp meets jadeꞌen nnøjmɨ jøts ku ø kaꞌap pøn nugo aja̱wɨ xnɨmiñ, pønɨ kaꞌap Dios Teety ja køꞌøm xagɨdøkɨ.

⁶⁶Wɨnets may ja̱a̱ꞌy myajtstuujtɨnɨyɨ ja nwɨndsønꞌa̱jtɨm Jesús, kaꞌap ja tꞌukmøøtwɨdejtnɨdɨ.

⁶⁷Xjats ja nwɨndsønꞌa̱jtɨm Jesús ojts tyiktɨy jøts ojts tnøjmɨ ja ñɨmakmajtskpɨ ja̱a̱ꞌy pøn ja pyabøjkpɨꞌajtpy: ―¿Mnøjkxwa̱mɨp meets nayɨdeꞌen?

⁶⁸Jøts ja Simón Pedro ja ojts yɨdeꞌen yꞌadsøyɨ: ―¿Pønɨmts øø teety nja̱a̱ktyimñɨnøjkxp? Tum jaꞌats me mgajpxpy midi xemɨkøjxp yikjujkyꞌa̱jtp.

⁶⁹Tøts øøts yø njanchja̱ꞌwɨñɨ jøts nnɨja̱ꞌwɨp øøts jøts ku me Cristo, ja Dios Uꞌnk, midi jujky midi kunuuꞌkxy.