Juan 6:5-19

⁵Or mtsere lo Jesús mwii Jesús lo re men kuu ndeke dits Jesús, tsa nzhab Jesús lo Lip: ―¿Pa yatiʼaa kuu wu re men ree?

⁶Tenzhec mnaabdiz Jesús, tsa naa kwan gab Lip, tak neʼa Jesús naa kwan tsow Jesús.

⁷Tsa lee Lip mkab lo Jesús ne nzhab: ―Neeka chop gayoo denario pan, gaate par wu re men lutgay.

⁸Tsa lee Ndres thib re zha kuu ngeteed lo Jesús kuu nak wets Simún Pey, nzhab:

⁹―Nzhee ndo thib nde lut kuu nap gaay pan cebad ne chop mbel; per pa ga koree wu naroob men.

¹⁰Tsa nzhab Jesús: ―Guz goo lo re men tsa tob men. Ne kwaro ndab yizhwan tya, tsa mndob re men ne beeta re mbyi nak teeka gaay mil zha.

¹¹Tsa mzhen Jesús re pan, ne mndaa Jesús texkix lo Diox, ne mdid re zhay lo re men. Ne tataka mtsow Jesús kon rop mbel, ne mdow re zha asta plotha mze leettsoo zha.

¹²Or ngwalo ndow re zha, tsa nzhab Jesús lo re zha kuu ngeteed lo Jesús: ―Bthop goo re kuu mrozhoob, tsa yetsaate.

¹³Tsa mthop re zhay, ne mtse zha tsiibchop chekwit ngoo re kuu byu kuu mrozhoob lo re gaay pan.

¹⁴Or mwii re men re milagr kuu mtsow Jesús, tsa nzhab re zha: ―Wlipaa lee zha ree nak profet kuu ne Diox yaad lo yezlyu.

¹⁵Per myeen Jesús lee re men ngwalaaz to Jesús, tsa gak Jesús rey lo re zha, kona tee mbeche Jesús lo re zha, ne ngwa thita Jesús yek yii tedib welt, tak nlaaz Jesús to thita Jesús.

¹⁶Or ngoo yaal, lee re zha kuu ngeteed lo Jesús ndala roo nitdoo,

¹⁷ne mke re zha leen thib kano par rid zha tedib lad nitdoo, par tsin zha yez Capernaúm. Ne ngooʼa yaal lee Jesús terka tsin lo re zha.

¹⁸Ne lee thib mbi thoz mroo mndelo mkwin nitdoo.

¹⁹Ne or ndaʼa re zha teeka thib gaay mil o xoop mil metr lo nitdoo, tsa mwii re zha lee Jesús ndetsin lo re zha ndyaad nde lo nitdoo, tsa kwathoz mzeb re zha.