Juan 6:48-70

⁴⁸Siaken se kànen egpemegay te kaling pedowan wedad temanan.

⁴⁹Peg-ogpà te menge kemonaan niyo kidoen te kebigtilan, nematay dan pengkey kimaen dan te mana imbegay te Timanem kandan lekat te langit.

⁵⁰Meneng sebad kemolò se kànen seini insogò den dini lekat te langit, so se kedita te otaw komaen kani, yan se otaw eked palos kematay se pedowan din.

⁵¹Siaken se kànen insogò dini lekat te langit mekebegay te kaling pedowan. Aw komaen se otaw te kànen seini, wedad temanan te pedowan din. Se kànen seini ibegay ko, yan se onod ko, amon mekekinawà se kedita te otaw te kaling pedowan.”

⁵²Pegdineg te menge obanen te Judiyo kenyan, migpedindilay dan, kagi dan, “Eked sikandin pemegay te onod din kenitadon amon mekaen tadon iyan.”

⁵³Minikagi si Jesus, “Eneng-enengi niyo se kagi ko kenyo. Aw eked kaw kaen te onod ko, aw eked kaw heman inem te dipanog ko, wedad kaling pedowan ibegay kenyo. Siak se Timanem Migpekeotaw,

⁵⁴aw se otaw komaen te onod ko aw minem te dipanog ko, yan se otaw begayan ko te kaling pedowan wedad temanan, aw entayen ko pa sikandin te temanan aldaw.

⁵⁵Ontò mekaen se onod ko, aw ontò heman meinem se dipanog ko.

⁵⁶Se otaw komaen te onod ko aw minem te dipanog ko, yan se eg-ogpà diyà kanak, aw siak diyà kandin.

⁵⁷Insogò a te Amay ko wedad temanan din, aw doen heman pedowan ko wedad temanan lekat kandin. Iling heman kenyan se otaw komaen kanak, so yan se otaw begayan te pedowan wedad temanan pineokit kanak.

⁵⁸Seini se kànen lekat te langit. Kenà ini iling te mana, so nematay se kemonaan niyo pengkey kimaen dan kenyan. Meneng se otaw komaen te kànen seini, wedad palos temanan te pedowan din.”

⁵⁹Yan se intoladà i Jesus kidoen te simbahan te Judiyo doton te lonsod te Kapirnaom.

⁶⁰Pegdineg te menge tinoledaan i Jesus te intoladà din seini, medita kandan se migpebelaw-belaway, kagi dan, “Eked nael pemenali se intoladà din seini. Wedad besi palos otaw mekepemenal kenyan.”

⁶¹Netegahan i Jesus te doen menge tinoledaan din nebensi te intoladà din, aw minikagi sikandin, “Nepela a so nebensi kaw te inikagi ko seini.

⁶²Labi pa besi se kebensi niyo aw kitaen a niyo Timanem Migpekeotaw aw megpeengat a doton te langit eg-ogpaan ko kedengan.

⁶³Timanem olò se mekebegay te kaling pedowan. Eked iyan keabat pineokit te pagod te otaw. Meneng se kebenalan intoladà ko kenyo, yan se lekat te Timanem aw mekebegay te kaling pedowan.

⁶⁴Doen dini kenyo eked pemenal kanak.” Yan se inikagi i Jesus so tapay din netegahan aw sinu se otaw eked pemenal, aw netegahan din heman aw sinu se otaw megtolok kandin.

⁶⁵Minikagi heman si Jesus, “Yan se doun te minikagi a diyà kenyo te wedad otaw meketaking kanak singed aw onà entagen se pedowan din te Amay ko.”

⁶⁶Lekat niyan, medita se tinoledaan timanan ki Jesus aw limengà dan te pegtaking kandin.

⁶⁷Minikagi si Jesus diyà te sìyan sempolò teg dowa tinoledaan din, kagi din, “Meibeg kaw lay heman tomanan kanak?”

⁶⁸Timaba si Simon, se doma ngadan din si Pedro, kagi din, “Pengolo, wedad palos doma tekingan day, so sebad no se egtoladà tepad te kaling pedowan wedad temanan.

⁶⁹Nemenal kay den kamno, aw netegahan day te wedad salà no aw sikona se insogò te Timanem.”

⁷⁰Minikagi si Jesus, “Pengkey pinemallì ko sikiyo sempolò teg dowa, meneng doen sebad diyà kenyo sakop i Satanas.”